Eloti wábula Dibundu

Eloti wáhonda Zyaki amana wákotisa Phetelu mu boloku. Wanzyo wa Tata wetu wábula misinga muna phipa amana myelu myáyafwadila myawu-meni; Phetelu wabánza ni wenina mu mbona mesu. Muna lukutakanu lwa lombilu, musadi wa mukhetu wázimbulwa ni wenina kilawu. Eloti, bwosu bántela ni nzambi, wáfwa.

Kapitulu 12.

Muna tangwa dina, kyamvu Eloti wáyandika kuhanga mbi kwena batu bankaka bana bákala ba Dibundu, mukuma kázola kubaheka phasi. Wáhondisa Zyaki, phangi wa Yowani, ni mbedi. Bwosu kámona ni dyambu dina dyásephidisa Bayuta, Eloti wáyandika phi kukwata Phetelu, muna bilumbu bya mapha makonda muvimbu. Wámukwata, wámukotisa mu boloku, amana wámuheka kwena bibuka biya bya baphumbulu, kadika kibuka baphumbulu bana, hanga bamuphatila; mukuma kázola kumulubusa ku batu kunima dya mukinzi wa Phaki.

Phetelu kákala wuphatila mu boloku, kaasi Dibundu dyákala lombila Tata wetu yi ngolu zoosu kikuma kyandi. Muna phipha dina, buna Eloti kedi kumulubusa, Phetelu kákala nimba hakati dya baphumbulu bodi, wákangama ni misinga miodi; amana batsinzidi kuna thwala mwelu bákala phata boloku. Muna mbala mosi, wanzyo wa Tata wetu wátelama bela-bela yandi, amana suku dyábasa yi mwini. Wábula Phetelu ku luketo, wámutokamisa amana wuzimbudi: «Telama nswalu.» Misinga myábwa mu moku mandi. Wanzyo wumuzimbwadi: «Vwata miledi amana vwata tsabatu zaku.» Phetelu wáhanga bwabuna. Amana wuzimbudi: «Zinga muzaka waku amana wundanda.» Buna Phetelu wálubuka amana wálanda, konda zaya ni mihangu mya wanzyo mya kyedika myákala; wabánza ni ndosi kámona. Bwosu bahíta homa ha batsinzidi ba theti yi ba bodi, bátula ha mwelu wa kisengu wuna wukotisi ku mbanza, wuna wáyafuluka wawu-mveni kwena bawu. Bálubuka, bádyata mukhidi wumosi, amana muna mbala mosi wanzyo wákatuka kwena yandi.

Amana Phetelu wádiyuka mwena yandi-meni amana wuzimbudi: «Bwabu yizayidi mu kyedika ni Tata wetu wáhitika wanzyo wandi amana wákhutumuna mu koku dya Eloti yi mu mana moosu mákala Bayuta mubanzila.» Bwosu kábakulabwa, wénda kuna nzu ya Madiya, wuna wákala ngudi wa Yowani, wuna phi bákala tela Malaku, kuna batu balawu bákhokana mu kulombila. Buna Phetelu kákhokwata kuna mwelu wa luphangu, mwana ndumba wa kisalu, khumbu yandi Loda, wísa vutula. Bwosu kázaya ndinga ya Phetelu, wásephila lawu, mu phila ni kalútina kukota konda kuyafula mwelu, amana wásamuna ni Phetelu kuna katelama.

Bawu bázimbula: «Ngeyi wisi lawu!» Kaasi yandi wávutula yi ngolu ni dyambu dya kyedika dyákala. Buna bázimbula: «Wanzyo wandi kenina.» Kaasi Phetelu wánangina mu kukhokwatila; buna báyafuludi mwelu amana bámumona, báyituka lawu. Mu kubasongila koku ndangu badibata, wábatendwala bwosu Tata wetu kámulubusa mu boloku. Wuzimbudi: «Luzimbwala mambu mama kwena Zyaki yi baphangi.» Amana wénda ku homa hankaka.

Buna kuma kwakya, mvwalangani yineni yákala hakati dya baphumbulu kikuma kya mana mabwíla kwena Phetelu. Eloti, kunima dya kumusosa amana kámusengumunaku, wáhyula batsinzidi amana wásenda ni babahondisa. Amana wákulumuka tuka ku Yuteya yi kuna Sezale, kwakuna wánanga.

Tata wetu wábula Eloti

Eloti wákala yi khabu kwena bisi Tidi yi Sitoni. Ha kimosi bisa kwena yandi, amana bwosu bánungina Balasitu, mutwadisi wa nzu ya kyamvu, bálomba ngemba, mukuma mahata ma bawu makala tambula madya mu tsi ya kyamvu. Muna kilumbu kina kyazengama, Eloti wávwata miledi mya kipfumu, wázakala hana kiti kya kipfumu, amana wákala bazonzila. Amana mulumba-lumba wa batu wákala kalunga: «Yayi ndinga ya nzambi, kaasi ka ya mutu ku!» Muna mbala mosi, wanzyo wa Tata wetu wámubula, kikuma kámuhekaku Tata wetu khembu; amana mintoyi myámudya amana wáfwa.

Kaasi ndinga ya Tata wetu yákala mwanganina yi kukula. Balanabasi yi Sawulu bávutuka tuka ku Yelusalemi, kunima dya kumanisa kisalu kya bawu, mu kunata Yowani, wuna bákala tela phi Malaku.