Batu Bakondidi Kwikama kwena Tata
Basadi ba leta bázimbula ni bambuta ba Kiseledi-meni bátekila mu kukwela batu ba binzunga bana bázyengila bawu. Ezela wáyata miledi myandi, wálumuna lusuki lwa mutwa wandi, amana wázakala mu kyadi tee ni masika, buna wálombila, mu kufunguna masumu ma hehele, amana mu kuyituka ni Tata wetu wábabeta khufi ku mana máfwanana yi masumu ma bawu.
9 1Kunima dya mana máhangama, basadi ba leta bakwísa kwena meni, bázimbula: «Batu ba Kiseledi, banganga Nzambi, yi balefi kabadiyekudiku ku batu ba binzunga yi mambu ma bawu ma nzanzi—bisi Kanana, bisi Heti, bisi Pelezi, bisi Yebusi, bisi Amoni, bisi Mowabi, Bisi Ngiphiti, yi bisi Amoli. 2Bábonga ndambu ya bana ba bawu ba bakhetu hanga bakhetu kikuma kya bawu-meni yi bana ba bawu ba bayakala, amana babundikisi butuka dya bukheti yi batu ba binzunga. Amana basadi ba leta yi bambuta bawu bátekila muna kukonda kwikama meni.»
3Buna ngyukiki mana, yáyata muledi wama yi muzaka wama, yálumuna lusuki lwa mutwa wama yi mandefu mama, amana yázakama yi kyadi kya lawu. 4Buna, boosu bana bátekita ha ndinga za Nzambi wa Kiseledi, Tata wetu, bákhokama kwena meni kikuma kya kukonda kwikama kwa batu bana bákala mu boloku; amana yázakama yi kyadi tee ni tangwa dya kutambika kimenga kya masikidika. a a v4 Kimenga kya masikidika kyakala kimenga kya kutambika kosu kosu kilumbu, kina bakala tambika bela-bela yi tangwa tatu dya masikidika.
5Muna tangwa dya kutambika kimenga kya masikidika, yávumbuka mu kudikulumuna kwama, muledi wama yi muzaka wama wuyatukini, amana yáfukama, yálambula moku mama kwena Tata wama, 6amana yázimbula: «A Tata wama, yena yi tsoni amana meni mukwa mvwezolo mu kutombula mbunzu yama kwena ngeyi, A Tata wama, mukuma masumu metu málutini mitwa metu, amana ndola yetu yákola tee ku mazilu. 7Tuka mu bilumbu bya bakhaka betu tee ni buthwena, twenina mu ndola ya lawu; amana kikuma kya masumu metu, betu—bakyamvu betu yi banganga Nzambi betu—bátulambula kwena bakyamvu ba tsi, ku mbedi ya phoku, ku boloku, ku kuyiba bima byetu, yi ku tsoni ya ha mesu metu, bwosu bwenina buthwena. 8Kaasi buthwena, mu tangwa dyakhufi, khenda yitukidi kwena Tata wetu, wátusisila ndambu yisadini, amana wátuheka nzila ya kuzyama muna homa handi ha bukheti, hanga katómuna mesu metu amana katuheka fyoti kya kuvutula moya muna kihika kyetu. 9Twenina bahika; kaasi Tata wetu kátuyambudiku muna kihika kyetu. Watumonisa khenda yandi ku thwala bakyamvu ba Pelesi, mu kuvutula moya wetu hanga twatelamisa nzu ya Tata wetu, twatungulula mabwa mandi, amana katuheka kibaka kya luphangu mu Yuta yi mu Yelusalemi.
10Amana buthwena, A Tata wetu, biki twalenda zonza kunima dya mana? Mukuma tuyambudi mitsiku myaku,
11mina wáthuma mu munwa wa basadi baku bambikudi: “Tsi yina lwenina kota mu kuvwa yakitukini ya mvindu kikuma kya mambu ma mvindu ma batu bandi, bana mihangu mya bawu mya nzanzi mizadisini yawu tuka tsongi yi tsongi yi mvindu ya bawu. 12Buna buthwena, luhanaku bana benu ba bakhetu kwena bana ba bawu ba bayakala, holo lubongaku bana ba bawu ba bakhetu kikuma kya bana benu ba bayakala, amana lusandaku keti ngemba ya bawu ho kimvwama kya bawu, hanga lwazyama, lwadya mamboti ma tsi, amana lwasisila byawu bana benu hanga kimvwama mu matangwa moosu.”
13Kunima dya mana moosu mátubwila kikuma kya mihangu myetu mya mbi yi ndola yetu ya lawu—ha mana, ngeyi, A Tata wetu, kútubetaku bwosu bufwani masumu metu, kaasi wátubeta fyoti kaka, amana wátuheka ndambu yisadini bwabu, 14twalenda kulula hika mitsiku myaku, amana twakwela yi batu bana bisi hanga mana mambu ma nzanzi? Ngeyi kukalaku yi khabu kwena betu tee ni wátubebisa betu boosu, konda kusisa ndambu ho mutu wa kuhuluka? 15A Tata wetu, Nzambi wa Kiseledi, ngeyi wenina mukwa masonga, mukuma twásala, ndambu yina yahúluka, bwosu bwenina buthwena. Tala, twenina ha mesu maku yi ndola yetu, holo ka mutu ku walenda telama ha mesu maku kikuma kya dyawu.»
