Bulahami ku Ngelali
Bulahami wátela hika Sala ni phangi wandi wa mukhetu, amana Abimeleki wámubonga. Tata wetu wákebisa kyamvu mu ndosi ku thwala ya kumusimba, amana Abimeleki wázonza ni kakonda sala mbi. Bulahami wábatula ni wábanza kaka ni ka mutu ku wa hakana wisi bweya bwa Tata wetu.
Tata wetu kisi zonza mu mavese 3, 6–7
20 1Amana Bulahami wákatuka kuna, wenda ku Negevi, wenda kala hana kati dya Kadesi yi Suli, amana kázingila hanga munzenza ku Ngelali. 2Amana Bulahami wuzimbudi kikuma kya Sala, mukhetu wandi: «Yandi kenina phangi wama wa mukhetu.» Buna Abimeleki, kyamvu wa Ngelali, wátuma batu mu kunata yandi, amana wábonga Sala.
3Kaasi Tata wetu wísa kwena Abimeleki mu ndosi muna phipha yina: «Ngeyi wenina hanga mutu wufini kikuma kya mukhetu wuna wábonga, mukuma yandi kenina mukhetu wenina yi yakala.»
4Kaasi Abimeleki kafikamaku kwena yandi. Wuzimbudi: «A Pfumu Nzambi, ngeyi wafwadisa phi nati dyakonda sala mbi? 5Keti ka yandi ku kázimbula kwena meni: “Yandi kenina phangi wama wa mukhetu”? Amana yandi mukhetu meni phi wuzimbudi: “Yandi phangi wama wa yakala.” Meni yábatila mambu mama mu mbundu ya masonga yi mu moku makonda sala mbi.»
6Amana Tata wetu wumuzimbwadini mu ndosi: «Eeh, nzayibwa ni wábatila mambu mama mu mbundu ya kasemi, amana yákukeba ndangu wasumukaku kwena meni; yihana ka yikuyambula ku mu kusimba yandi. 7Buthwena, vutula mukhetu wa mutu wuna, mukuma yandi kenina mbikudi wuna kakúlombidila, amana ngeyi kazínga. Yuka ni kuvutula yandi ku, zaya ni kyedika ngeyi kafwa buna bufwani, ngeyi yi boosu bana benina ba ngeyi.»
8Amana Abimeleki wátelama tswatsu muna suka, wátedisa basadi bandi boosu, amana wábazimbwala mambu moosu mábwa; bweya bwa lawu bwábakwata batu bana. 9Amana Abimeleki wátedisa Bulahami amana wumuzimbwadini: «Biki wábatila betu? Abweti yásumukina kwena ngeyi, hanga wísa nata disumu dya mbuta hana meni yi hana kipfumu kyama? Wábatila meni mana ka mafwani kusadilabwa ku.» 10Amana Abimeleki wuzimbudi phi kwena Bulahami: «Biki wákala banza, hanga wábatila dyambu dya mutindu wuna?»
11Amana Bulahami wuzimbudi: «Yábanza ni: kyedika kweku bweya bwa Tata wetu haha, amana bakhana kuhonda meni kikuma kya mukhetu wama.» 12Amana, mu kyedika, yandi kenina phangi wama wa mukhetu, mwana wa mukhetu wa tata wama, kaasi ka mwana wa ngudi wama ku, amana wákituka mukhetu wama.
13Muna tangwa Tata wetu kákatula meni ku nzu ya tata wama ndangu yikangala, yázimbula kwena yandi ni: Songila meni khenda yayi—kwosu kuma kuna twakwenda, zimbula kikuma kya meni: «Yandi kenina phangi wama wa yakala.»
14Amana Abimeleki wábonga mikoku, bangombi, yi basadi ba bayakala yi basadi ba bakhetu, wábahana kwena Bulahami, amana wámvutudila Sala, mukhetu wandi. 15Amana Abimeleki wuzimbudi: «Tsi yama yenina ya kukanguka kwena ngeyi; kala kwosu kuma kuna wazola.» 16Amana kwena Sala wuzimbudi: «Tala, yihana phangi waku wa yakala makuta ma fwalanga difunda dimosi. Byabi byenina mu kufidinga mbi yina bákubatila ku mesu ma boosu bana bena yi ngeyi; ku thwala ya batu boosu ngeyi wenina wakasemi lawu.»
17Amana Bulahami wálombila kwena Tata wetu, wuna wábelula Abimeleki, mukhetu wandi, yi basadi bandi ba bakhetu, hanga babuta bana hika, 18Mukuma Tata wetu wázibika lawu vumu yosu muna nzu ya Abimeleki, kikuma kya Sala, mukhetu wa Bulahami.
