Tata Wusila Kilangi kya Kuvutulula Kanda Dyandi

Mazu masonikwa mu mukanda kikuma kya batu ba bilumbu bya ku thwala. Tsisi yenina ya kyedika amana phuta yiluta medina moosu ma batu, kaasi Tata wuna wábabula wisi sila ni kakababuka yandi-meni, ni kabukuna tsibu hana tsingu za bawu, amana ni kakituka Tata wa bawu dyaka.

Tata wetu kisi zonza mu mavese 2–3, 5–22

Kapitulu 30.

Ndinga yina yátula kwena Yelemiya kutuka kwena Tata wetu:

Mama mazimbudi Tata wetu wa Kiseledi: Sonika mu mukanda mazu moosu mana yázonza kwena ngeyi. Tala—bilumbu byisini, kazimbudini Tata wetu, bina yivútulula kuvwa kwa batu bama Kiseledi yi Yuta, kazimbudini Tata wetu, amana yibávutula mu tsi yina yáhana bakhaka ba bawu, amana bayívwa yawu.

Mama mazu mana Tata wetu kázonza matadidini Kiseledi yi Yuta:

Mama mazimbudi Tata wetu: «Twáyuka nyengi dya bweya—tsisi, konda ngemba. Yufula buthwena amana tala: akolu yakala kalenda buta? Buna kikuma kya biki yibati mona yakala-phandi wosu ni moku mandi hana luketu lwandi hanga mukhetu wuna wenina mu phasi za kubuta, amana zizi dyosu dikituki dya mphembi? Khi kyadi kya kilumbu kina kyenina! Ka kyena kyafwanana yi kyawu. Kyenina tangwa dya phasi kwena Yakobi—kaasi muna kyawu kahúluka. Muna kilumbu kina, kazimbudini Tata wa basuta ba zilu, yíbukuna muteti hana tsingu yaku amana yizénga miyololu myaku, amana banzenza bakamunataku hika mu kihika. Kaasi basadila Tata wetu, yi Tavidi kyamvu wa bawu, wuna yibátelamisina. Buna wuyukaku bweya, Yakobi musadi wama, kazimbudini Tata wetu, amana wukatulaku kikesa, Kiseledi; mukuma tala—yikúhulula kutuka ku thama, amana bana baku kutuka mu tsi ya kihika kya bawu. Yakobi kavutuka mu talala yi ndembamu, amana ka mutu ku wámuyukisa bweya. Mukuma yenina yi ngeyi mu kukúhulula ngeyi, kazimbudini Tata wetu. Ata yifwása kimakulu makanda moosu mana mukati dya mawu yákumwanga ngeyi, yikúfwasaku ngeyi kimakulu. Kaasi yikútsungika ngeyi mu masonga, amana yikúyambulaku ngeyi konda ndola kimakulu.»

Mukuma mama mazimbudi Tata wetu: «Mbela yaku yikonda belula, phuta yaku yenina ya ngolu. Ka mutu ku wálombila mulonga waku; kikuma kya phuta yaku, ka kwena medina, ka kwena belula kwena ngeyi. Bazodi baku boosu bázimbakana ngeyi; bakala yi kyadi kyaku ku. Mukuma yákukuta ngeyi hanga bukisi mbeni kuta, mu tsungika ya mutu wa mbundu ya khufi, mukuma mbi yaku yidi yineni amana masumu maku madi malawu. Kikuma kya biki wubati dila kikuma kya mbela yaku? Phasi zaku zikonda belula. Mukuma mbi yaku yidi yineni amana masumu maku madi malawu, yásala mama mambu kwena ngeyi. Buna boosu bana bisi kudya ngeyi badíwa, amana bambeni zaku zoosu—kosu mosi hana kati dya bawu—bakwenda mu kihika; babana bisi kubotula ngeyi babótulwa, amana boosu bana bisi kukwata ngeyi yibáhana hanga bima bya kudya.» Mukuma yivútulula kimakulu kyaku amana yibélula phuta zaku, kazimbudini Tata wetu, mukuma bakutela nana mutu basiya: «Yayi Siyoni—ka mutu ku wena yi kyadi kyandi.»

Mama mazimbudi Tata wetu: «Tala—yivútulula kuvwa kwa masombolu ma Yakobi amana yifwila nzu zandi khenda; mbanza yitúngulula hana thandu ya dibundu dyandi, amana nzu ya kyamvu yitélama kuna kuyifwanini. Muna bawu mukatuka kuvutula kwa matondu yi minyengi mya kyesi. Yibávudisa, amana bakalaku bafyoti; yibázitisa, amana bakalaku baleki. Bana ba bawu bakakala hanga bwosu bákala kuna thama, amana lukutakanu lwa bawu lutélamisa ku thwala yama, amana yihéka ndola kwena boosu bana bisi kubasuna. Mutwadisi wa bawu kakála mosi mukati dya bawu, amana pfumu wa bawu katúka mukati dya bawu. Yikúnata yandi bela-bela, amana yandi kábwesuka kwena meni. Mukuma, konda bwabuna, nati wafwana kukasa mbundu mu kuheka moya wandi mu kubwesuka kwena meni? kazimbudini Tata wetu. ^a Amana benu lukadiki bana bama, amana meni yikadiki Tata wenu.»

Tala — pfunzi ya Tata wetu! Nganzi yitukidi, pfunzi ya ngolu yisi kombula; yikatuluka hana ntu wa batu ba mbi. Nganzi ya mbawu ya Tata wetu yikavutukaku ku manima, tii yandi kalungisa amana kasala mabanza ma mbundu yandi. Muna bilumbu byisini, lukabakula dyadi.