Zofala Wuvutudi Hika

Zofala wávutula mu mvwalangani yandi meni ni kifwanisu kya kunungu kwa khunda kwa mukwa mbi: wisi mina bimvwama amana wisi byo luka, wisi keba mbi ku tsi ya lulaka lwandi tii yikituka ndikila ya nyoka. Wisi tela dyadi ndambu yina Nzambi kasikununa, amana kaheka kima kyahika ku.

Kapitulu 20.

Amana Zofala, mwisi Naama, wávutula: «Kikuma kyaki, mabanza mama ma kiwayi malundika meni mu kuvutula, kikuma kya mvwalangani yenina mu kati dya meni. Yisi yuka ngusi yina yisi mphwesa tsoni, amana, mu ngangu zama, kitembu kisi nkindisa mu kuvutula. Mukyedika wuzayi bwabu buna bwákala tuka khulu, tuka basya mutu ha tsi: kunungu kwa mukwa mbi kwenina kwa khunda, amana kyesi kya mukondi Nzambi kisi nanga kaka tangwa dimosi. Yanduna lulendu lwandi lwatula tii kuna zilu amana mutwa wandi wasimba matuti, kazimbala mvula yi mvula, hanga kuzanga kwandi mwenemwandi; bana bámumona batíka phyula: “Wena kubiki?” Kavevuka hanga ndosi, kabamúwanaku hika, bámukukwasa hanga mbonono ya phipha. Disu dina dyámumona dyamúmonaku hika; kifulu kyandi kyamutalaku hika. Bana bandi balomba kwena batsukami; amana moku mandi mwenemandi mámvutula bimvwama byandi. Ngolu za kingunza zina zisi basisa mifufwa myandi zalala ha kimosi yi yandi muna mputulu. Yanduna mbi yenina ya pha mu munwa wandi amana wusi musweka ku tsi ya lulaka lwandi, yanduna kazolaku kuyekula, wuyibatika kaka mu munwa wandi, kaasi madya mandi makituka ma ngani mu kundu dyandi; makituka ndikila ya banyoka mwena yandi. Wusi mina bimvwama kaasi wubiluka byawu; Nzambi kabikukwasa mu kundu dyandi. Wusi nwa ndikila ya banyoka; menu ma sawa mamúhonda. Katalaku hika banzadi, banzadi bina bisi tíka bwiki yi mabele. Kavutula mbutu ya lombu dyandi konda kumina; kásephilaku ni mbongu ya kikhita kyandi. Mukuma wánikumuna amana wásisa batsukami; wákwata nzu yina kakátungaku. Mukuma kundu dyandi dyákala konda ngemba, káhulukaku ni thinu zina káhanga. Konda kima kyásala kya yandi kudya; bwabuna bimvwama byandi byanangaku. Muna kuvula kwa bima byandi, phasi zamúbwila; kizitu kyosu kya kiwayi kyamúbwila. Muna tangwa kabasisa kundu dyandi, Nzambi kafidisa pfundusu yandi ya mbawu kwena yandi amana kayinokisa ha thandu yandi hanga madya mandi. Yanduna katina ku mbedi ya kisengu, ta ya khuvu yamutubula mu lutu. Wuyikatula, amana yitukini mu lutu lwandi; tsongi yisi kyenza yitukini mu khadi yandi. Mambu ma bweya mámubwila. Phipha yosu yisi leya kuvwa kwandi; mbawu yina ka mutu ku wákinda yazinisa yandi amana yadya kyosu kina kyásala muna nzeketo yandi. Mazilu matungulula ndola yandi, amana tsi yatelama kumunwanisa. Bima byosu bya nzu yandi byanatwa, byakombulwa muna kilumbu kya pfundusu ya Nzambi. Yikyakyi kabu dya mutu wa mbi kitukila kwena Nzambi, kabu kina Nzambi kámusikidila.»