Mutu wuna wábutuka phofu
Mutu wákala phofu tuka lubutuku, bámukusa thoba, wásukuka, amana wámona, hanga mihangu mya Tata wetu myamonika mwena yandi. Bámuhyula mbala zodi, kaasi kázolaku kuyambula dyambu: wákala phofu, bwabu wisi mona. Nzu ya kimvuka yámukukwasa, Yesu wámuwana, amana bana bisi banza ni bisi mona kaka benina baphofu.
9 1Muna kuluta kwandi, Yesu wámona mutu mosi wákala phofu tuka lubutuku lwandi. 2Balonguki bandi bamuhyudini: «Labuni, nani wásumuka, mutu yandu holo bibuti byandi, hanga kábutuka phofu?»
3«Mutu yandu kasumukiku, bibuti byandi phi basumukiku,» Yesu wávutula, «kaasi dyambu dyadi dyasalama ndangu mihangu mya Tata wetu myamonika mwena yandi. a a v3 Yesu kazodiku bakula phofu ya mutu yandu ni yakala thumbudulu kikuma kya masumu. Kaasi, wásongila kwena Tata wetu, wuna muhangu wandi wa luhulusu wakakála monika mu fulu dina tsi yámona kaka kubua. 4Betu tufweti hanga mihangu mya wuna wáthuma bwosu bwenina muini; phipha yikwisa, muna tangwa dina ka mutu ku kalenda hanga. 5Bwosu yenina mu tsi, meni yenina mwini wa tsi.»
6Kunima dya kuzimbula bwabuna, wáhuma metya hana tsi, wáhanga ntoto mu metya mana, amana wákusa ntoto meni mu mesu ma mutu.
7Wumuzimbwadini: «Ndawenda, wasukuka mu kiziba kya Silowe» -disongidila «Wuna bátuma»-. Buna mutu wendi, wasukuka amana wávutuka wukala mona.
8Bakwa mukombu yi bana bámumona ku theti bwosu kalombaka bazimbudi: «Ka yandu ku wuna wakala zakala ndangu kalombaka?» 9Bahika bazimbudi: «Yandu kenina.» Bahika bazimbudi: «Nkatu, kaka wufwananini yandi.» Yandi wakala zimbula: «Meni kenina.»
10Buna bamuhyudini: «Buna, mesu maku makanguki mu khi mutindu?»
11Wávutula: «Mutu wuna bisi tela Yesu wáhanga ntoto, wákusa wawu mu mesu mama amana wunzimbwadini: “Ndawenda ku Silowe amana wasukuka.” Buna yendi, yísukuka amana yámona hika.»
12Bamuzimbwadini: «Kweti kenina?» Wázimbudi: «Nzayiku.»
13Bánata mutu wuna wákala phofu kwena Bafwadisi. 14Kinga, kyákala kilumbu kya sabata tangwa Yesu káhanga ntoto amana wátemuna mesu mandi. 15Buna Bafwadisi phi bamuhyudini hika buna kátambula mesu ma kumona. Wubazimbwadini: «Wásya ntoto mu mesu mama, yísukuka amana yenina mona.»
16Bahika mu Bafwadisi bazimbudi: «Mutu yandu kátukaku kwena Nzambi, mukuma kálandaku sabata.» Bahika bazimbudi: «Mu khi mutindu mutu wa musumuki kafwani hanga bidimbu bya mutindu wawuna?» Buna bádikabisa hakati dya bawu.
17Bamuhyudini hika phofu: «Ngeyi, khi wuzonzi mu diambu dyandi, bwosu kátemuna mesu maku?» Wázimbudi: «Yandi wenina mbikudi.»
18Bayuta bákwikilaku ni yandi wákala phofu amana wátambula kumona, yi kuna bátedisa bibuti bya mutu wuna wátambula kumona. 19Babahyudini: «Yandu kenina mwana wenu wuna lwisi zimbula ni wábutuka phofu? Buna, mu khi mutindu kabati mona bwabu?»
20Bibuti byandi bávutula: «Tuzayi ni yandu kenina mwana wetu amana ni wábutuka phofu. 21Kaasi mu khi mutindu kabati mona bwabu, tuzayiku; holo nani wátemuna mesu mandi, tuzayiku. Muhyulenu - yandi wukodi kedi; yandi meni kazonza mu kikuma kyandi.» 22Bibuti byandi bázimbula bwabuna mu kuyuka bweya bwa Bayuta, mukuma Bayuta báyukana kedi ni yuka mutu katambwasa ni Yesu kenina Kidisitu, bamukukwasa ku nzu ya kimvuka ya Bayuta. b b v22 Kukwaswa ku nzu ya kimvuka kwásongidila kuvambunu kwa mvimba, mu mukombu wa batu yi mu makinzi ma Nzambi, mu kanda dya Bayuta. 23Kikuma kya bwabuna, bibuti byandi bázimbula: «Yandi wukodi kedi; muhyulenu.»
24Buna bátedisa hika mutu yana, wuna ku theti kákala phofu, amana bazimbudi: «Hana khembu kwena Nzambi! Tuzayi kwetu ni yandu mutu musumuki kenina.»
25Wávutula: «Keti yandi wenina musumuki, nzayiku. Thinu dimosi nzayi: yakála phofu, bwabu yenina mona.»
26Bamuzimbwadini: «Khi dyambu káhangila kwena ngeyi? Mu khi mutindu kátemuna mesu maku?»
27Wubavutula: «Yáluzimbula kedi, amana lwayukaku. Kikuma kya biki lubati zola kuyuka hika? Benu phi lubati zola kukala balonguki bandi?»
28Amana bámutukwana, bazimbudi: «Ngeyi wenina mulonguki wandi, kaasi betu twenina balonguki ba Moyize. 29Tuzayi ni Nzambi wázonza kwena Moyize, kaasi tuzayiku ku katuka mutu yandu.»
30Mutu wubavutula: «Tala dyambu dya kuyituka: benu lwazayiku ku katuka, kaasi wátemuna mesu mama. 31Tuzayi ni Nzambi kayukiku basumuki, kaasi yuka mutu kakumisa Nzambi amana kahanga luzolu lwandi, Nzambi kámuyukila. 32Tuka tsi yásemwa, ka mutu ku wáyuka ni mutu watemuna mesu ma mutu wuna wábutuka phofu. 33Yuka ni mutu yandu kátukaku kwena Nzambi, kalendaku hanga keti kima.»
34Bámuvutula: «Ngeyi wábutuka mvimba mu masumu, kaasi ngeyi wubati kutulonga?» Amana bámukukwasa ku phenza.
Ngeyi Wukwikila?
35Yesu wáyuka ni bámukukwasa ku phenza, amana buna kámufinda, wázimbudi: «Ngeyi wukwikidi mwena Mwana wa mutu?»
36Wávutula: «Nani kenina, A Pfumu, hanga yamukwikila?»
37Yesu wumuzimbwadini: «Wumumoni kedi, amana yandi kenina wuna wisi kuzonzisa.»
38Wázimbudi: «Pfumu, yikwikila,» amana wámufukamina.
39Yesu wázimbudi: «Meni yísa mu tsi yayi kikuma kya kufundisa, hanga bana bakondi mona bamona, amana bana bisi mona bakituka phofu.»
40Bahika mu Bafwadisi bana bákala yi yandi báyuka mambu mana amana bazimbudi: «Keti betu phi twenina phofu?»
41Yesu wábazimbwala: «Yuka ni lwakála baphofu, lwakála konda disumu; kaasi bwosu lwisi zimbula: “Tumoni,” disumu dyenu disidi.»
