Yizenu kwena Tata mu Lusambulu
Tangwa bámuhyula buna bafweti lombila, Yesu wáheka ndinga, yayandika mu A Tata, kunima kingana kya nduku wuna wisi khokwatila mwelu muna kati-kati dya phipha. Mu kumufundila ni kakukwasa bitembu bya mbi mu ngolu ya Belezebule, wásakudula khunda yina, kunima wábaluka kwena Bafwadisi yi balongi ba mitsiku mu kubatubila mambu ma phasi mamingi kikuma kya busambudi bwa bawu bwa phamba.
11 1Yesu kákala lombila mu kifulu kimosi; bwosu kámana, mosi muna balonguki bandi wuzimbudi: «Pfumu, utulonga kulombila, bwana Yowani phi wálonga balonguki bandi.»
2Yandi wábazimbwala: «Tangwa lulomba, luzimbwala: A Tata, khumbu yaku yasakumunwa. Kipfumu kyaku kyakwísa. 3Utuheka kosu kilumbu mapha metu ma kilumbu na kilumbu. 4Amana utulolukila masumu metu, mukuma betu meni phi tulolukilaka wosu wuna wena yi mfuka kwena betu. Amana wututwalaku mu bimeka.»
5Yandi wábazimbwala: «Nati muna benu wena yi nduku, amana wakwenda kwena yandi muna kati-kati dya phipha, wazimbula kwena yandi: “Nduku wama, undefisa mapha matatu,
6mukuma nduku wama mosi wisa ku kitambu, amana yímonaku kima kya kumuheka,”
7amana yandi mu kati wuvutudi: “Wumpanaku phasi; mwelu wukangami kala, amana bana bama bena yi meni ha thangi. Yilendaku telama ni kukuheka kima”?
8Yiluzimbwala: Ata nduku wuna wena nimba kalendaku telama ni kumuheka kima kaka kikuma kya kinduku kyawu, kaasi kikuma kya kukonda tsoni kwa nduku wuna wena lomba, wuna wena nimba katelama ni kumuheka byosu bina kafweti.»
9«Yiluzimbwala: Lombenu, buna lwatámbula; sandenu, buna lwaséngumuna; khokwatilenu, buna baluyafwadila.
10Mukuma wosu wuna wisi lomba, yandi kisi tambula; wuna wisi sanda, yandi kisi sengumuna; bwabu kwena wuna wisi khokwatila, bamuyafwadila.
11Nati tata muna benu, yuka ni mwana wandi kalomba tsema, keti kamuheka nyoka?
12Ho yuka ni kalomba dyaki, keti kamuheka nkandu?
13Yuka ni benu, ata lwenina batu ba mbi, luzayi kuheka bana benu makabu ma mboti, abweti Tata wenina kuna zilu kalúta kuheka Kitembu Kyatoma kwena bana bámulomba!»
Kipfumu kya Tata wetu Kyizidi
14Yesu kákala kukwasa kitembu kya mbi kina kyakala baba. Bwosu kyalubuka, mutu wa baba wázonza, amana mulumba-lumba wa batu wáyituka. 15Kaasi bankaka muna bawu bázimbula: «Ni Belezebula, pfumu wa bitembu bya mbi, yandi kisi kukwasa bitembu bya mbi.» 16amana bankaka, mu kumuleya, bákala sanda kwena yandi kidimbu kya ku zilu.
17Kaasi yandi, mu kuzaya mabanza ma bawu, wábazimbwadi: «Kipfumu kyosu kyadíkabisa kyawu meni, kyazíluka; amana nzu yadíkabisa yi nzu yikwawu yabwa.
18Yuka ni Satana phi wadikabisa yandi meni, abweti kipfumu kyandi kyazyámina? Mukuma lwisi zimbula ni mu ngolu za Belezebula yikúkwasa bitembu bya mbi.
19Yuka ni meni mu ngolu za Belezebula yikúkwasa bitembu bya mbi, buna bana benu bisi kukwasa ni ngolu za nati? Kikuma kyokyo, balufundisa.
20Kaasi yuka ni meni ni mulembu wa Tata wetu yikúkwasa bitembu bya mbi, buna Kipfumu kya Tata wetu kyilubwidi kwena benu.
21Tangwa yakala-phandi, wuna wena yi binwaninu byosu, kakeba nzu yandi, bima byandi byenina mu ngemba.
22Kaasi tangwa mutu wuna wena yi ngolu kuluta kamunwanisa amana kamununga, wuna wunwanisa kabonga binwaninu bina yakala-phandi kákala sya mbundu mu byawu, amana kakabula muluta wandi.
23Mutu wosu wuna kakondi kala yi meni, yandi kenina mutendi wama; amana wosu wuna kisi khokila yi meni ku, yandi kisi mwanga.
24Tangwa kitembu kya mbi kisi lubuka mwena mutu, kisi diata mu tseki, mu kusanda homa ha kulembwila; kaasi kisiku mona homa. Buna kizimbula: “Yikwenda vutuka ku nzu yama, kuna yalubuka.” 25Amana bwosu kyatúla, kyawani nzu yakukombula bukheti yi yakunenga.
26Buna kyendi nata bitembu bikwawu nsambodi bya mbi kuluta kyawu meni; byákota amana byananga kuna, amana mambu ma tsuka ma mutu yina maluta ma theti ku mbi.»
27Bwosu kazimbula mambu mama, mukhetu mosi muna mulumba-lumba wa batu wábokila: «Kyesi kwena kundu dina dyákunata, yi mayeni mana mákuyemika!»
28Kaasi yandi wuzimbudi: «Kyesi kuluta kwena bana bisi yuka ndinga ya Tata wetu amana bisi yílunda!»
Mutu Wuluti Yonasi Wenina Haha
29Bwosu mulumba-lumba wa batu wákutakana, wáyandika kuzimbula: «Mbandu yayi yenina mbandu ya mbi. Yisi sanda kidimbu, kaasi kabahekwaku kidimbu, kaka kidimbu kya Yonasi. 30Mukuma bwana Yonasi wákituka kidimbu kwena bisi Ninive, yibwabuna phi Mwana wa mutu kakála kwena mbandu yayi. 31Pfumu wa mukhetu wa banda katélama, muna kilumbu kya pfundusu, ha kimosi yi batu ba mbandu yayi, amana kabábedisa; mukuma yandi mu binzunga bya kyana bya tsi kátuka kikuma kya kuyuka mudimu wa Solumoni, amana tala, kinga dyadi dyenina haha, diluti Solumoni.
32Bisi Ninive bátelama mu kilumbu kya pfundusu ha kimosi yi mbandu yayi, amana babábedisa, kikuma bábalumuna mbundu za bawu tangwa Yonasi kalonga; amana tala, dyadi dyenina haha diluti Yonasi.»
Mwinda wa Nitu
33«Ka mutu ku wisi lemisa mwinda amana wuwusya mu kifulu kyasweka ho ku tsi ya nzungu ya tuma, kaasi ha muzanga, ndangu bana bisi kota bamona kikhya. 34Disu dyaku dyenina mwinda wa nitu yaku: tangwa dyenina dyambote, nitu yaku yosu yafuluka mwini; kaasi tangwa dyenina dyambi, nitu yaku yafuluka phipha.
35Bwabuna, keba ndangu mwini wena mu ngeyi wukonda kala phipha.
36Buna, yuka ni nitu yaku yosu yafuluka mwini, konda kifulu kya phipha, yakála yosu yakenzuka, hanga mwinda wukukenzudila ni mwini wandi.»
Khi Kyadi kwena Bisambu bya Khatu
37Bwosu kazimbula, Mufwadisi mosi wámutedisa mu kudya yi yandi; wákota amana wákala ku mesa. 38Mufwadisi wáyituka bwosu kámona ni Yesu kásukulaku moku theti ku thwala ya kudya.
39Amana Pfumu wámuzimbwala: «Buthwena, benu Bafwadisi, phenza ya kopha yi dilonga lwisi semisa, kaasi mu kati lwafuluka yi kusipha kwa mbundu yi mambu ma mbi. 40Benu bilawu! Keti wuna wáhanga phenza, kahángaku phi mu kati?
41«Kaasi hanenu batsukami bima bina byenina mu kati, amana byosu byakála bya kasemi kwena benu.
42«Kaasi khi kyadi kwena benu, Bafwadisi! Lwisi hana kimosi kya kumi mu tsudi ya kitoku, mu bithundu yi mu miti myosu, kaasi lusisi kusungama yi lungongu lwa Tata wetu. Byabina byafwana lwasala, konda kuyambula mana makwawu.
43«Khi kyadi kwena benu, Bafwadisi! Mukuma lwisi zola biti bya thwala mu nzu za kimvuka za Bayuta yi kutambula mboti mu zandu.
44«Khi kyadi kwena benu! Mukuma lwenina hanga mazyamu makonda dimbu, amana batu bisi diata ha thandu ya mawu konda kuzaya.»
45Mosi wa balongi ba mitsiku wámuvutula: «Mulongi, mu kuzimbula mambu mama, wubati tulewula betu phi.»
46Amana yandi wuzimbudi: «Khi kyadi phi kwena benu, balongi ba mitsiku! Lwisi wongika batu miteti mya zitu, kaasi lusiku zola kusimba miteti mina keti ku mulembu wumosi.
47«Khi kyadi kwena benu! Mazyamu ma bambikudi lwisi tunga, kaasi batata benu bawu bana bábahonda.
48«Buna lwenina bambangi, amana lwisi tambwasa mu mihangu mya batata benu, mukuma bawu bábahonda amana benu lwisi tunga mazyamu ma bawu.»
49«Buna mudimu wa Tata wetu phi wázimbula: “Yikábahitika bambikudi yi bathumwa; bankaka mukati dya bawu, bakábahonda amana bakábanyokuna.”
50«ndangu menga ma bambikudi boosu, mana mátyakana tuka luyandiku lwa tsi, matangilwa kwena batu ba mbandu yayi,
51«tukidila ku menga ma Abelu yi kuna menga ma Zakadiya, wuna káfwa ha kati dya mesa ma kimenga yi nzu ya Nzambi. Eeh, yiluzimbwala, mambu mama makátangilwa kwena batu ba mbandu yayi.
52«Khi kyadi kwena benu, balongi ba mitsiku! Mukuma lwábonga sabi dya nzayilu; benu meni lwákotaku, amana lwákandisa bana bakala zola kukota.»
53Bwosu kátuka kuna, balongi ba mitsiku yi Bafwadisi báyandika kumunyokuna ngolu, kumufitikisa ndangu kazonza mambu malawu, 54bakala kumukeba, ndangu bamukwata muna kima kina kalenda zonza.
