Belula ha mesa ya Mufwadisi
Ku mesa ya Mufwadisi wábelula mutu wuna lutu lwandi lwábasa ni mamba, bwosu boosu bádibata. Hanga wázimbula kwena batu batedisa ni básola kiti kya ha tsina, amana kwena wuna watedisa ni katedisa batu bana balendaku kumuvutula. Mu mukinzi wa Tata wandi, batu bana batedisa bakala lomba ndoluka, amana batu ba mu mabala-bala banatwa mu. Kulandaka yandi kusi lomba byosu.
14 1Muna kilumbu kya sabata, tangwa Yesu kákota mu nzu ya mosi wa bapfumu ba Bafwadisi ndangu kenda dya, bakala musimbulula mu kiswiswiswi. 2Amana ku thwala yandi hákala yi mutu wuna lutu lwandi lwábasa ni mamba.
3Yesu wázimbula kwena balongi ba mitsiku yi Bafwadisi: «Keti bufwani mu kubelula mutu mu kilumbu kya sabata, ho ve?»
4Kaasi bawu bádibata. Buna wásimba mutu wuna, wámubelula amana wámuyambula ndangu kenda.
5Hanga wábazimbwala: «Yuka ni mosi wa benu kenina yi mwana wandi ho ngombi wandi, amana yabwa mu dibulu mu kilumbu kya sabata, kwena benu lwakonda kulubula tswatsu?»
6Amana bawu bámonaku kima kya kuvutula mu dyambu dyadi.
7Tangwa kámona buna batu bana kátedisa básola biti bya theti, wubatidi kingana kimosi:
8«Tangwa mutu kakutedisa ku mukinzi wa longu, wubongaku kiti kya theti, mukuma ngatu bátedisa mutu wa luzitu kuluta ngeyi. 9Buna wuna wulútedisa benu bodi kakwísa amana kázimbula: “Heka kiti kyaku kwena mutu wuna,” amana ni tsoni bulungini wabonga kiti kya ha tsina. 10Kaasi tangwa bátedisa, ndawenda zakala ha kiti kya ha tsina, ndangu tangwa wuna wukútedisa kakwísa, kázimbula: “Mukwetu, tombuka hana zilu.” Buna bakúzitisa ku thwala ya boosu bana bena yi ngeyi ku mesa. 11Mukuma boosu bana badítombula bakákulumuka, amana bana badíkulumuna bakátombuka.»
12Hanga wázimbula kwena mutu wuna wámutedisa: «Tangwa wusadisa madya ma mwini ho madya ma masika, wutedisaku banduku baku, baphangi baku, biwutu byaku ho bakwa mukombu baku ba kimvwama. Yuka ni wuhanga bwabuna, bawu phi bátedisa ngeyi mu mbala yikwawu, amana wukáfutama. 13Kaasi tangwa wusadisa lawu dya madya, tedisa baphutu, bikata, bifwa malu yi baphofu, 14amana wukála mukwa kyesi. Mukuma bawu bakondi kima kya kukúfuta, wukáfutama mu lufutumuku lwa batu ba masonga.»
Mukinzi wa Tata
15Tangwa mosi wa batu bana bákala ku mesa yi yandi wáyuka mambu mana, wumuzimbudi: «Mukwa kyesi wuna kakádya ku mukinzi mu Kipfumu kya Tata wetu!»
16Yesu wávutula: «Mutu mosi wásadisa lawu dya madya dya mbuta, amana wátedisa batu bawu lawu.
17«Muna tangwa dya lawu, wátuma musadi wandi ndangu kazimbula kwena bana bátedisa: “Alwisenu, mukuma byosu byayilama buthwena.” 18Kaasi bawu boosu, mutu yi mutu, báyandika kudisuwangana. Wuna wa theti wumuzimbudi: “Yásumba kilanga, amana bulungini yenda kyatala. Ndomba undoloka.”
19Wukwawu wuzimbudi: “Yásumba miluma mitanu mya bangombi, amana nda kumimeka. Ndomba undoloka.”
20Amana wukwawu wuzimbudi: “Buthwena yákwela mukhetu, amana buna yiléndaku kwisa.”»
21Buna musadi wávutuka amana wázimbula mambu mana kwena pfumu wandi. Hanga mukwa nzu wákala mu khabu amana wázimbula kwena musadi wandi: “Ndawenda tswatsu muna mabala-bala yi muna nzila za mbanza, amana nata mwamu baphutu, bikata, baphofu yi bifwa malu.”
22«“Pfumu,” musadi wázimbula, “bina wáhana muswa bísalama, amana homa hasyedi kedi.”
23Hanga pfumu wázimbula kwena musadi: “Ndawenda muna nzila za mbuta yi muna nzila za mahata, amana kotisa bawu ni ngolu, ndangu nzu yama yabasa yi batu. 24Mukuma yiluzimbwadi: ka mutu wumosi ku wa bana bátedisa wayédika lawu dyama.”»
Thalu ya kulanda Yesu
25Milumba-lumba mya batu mikala kwenda yi yandi, amana wákituka kwena bawu, wázimbula:
26«Yuka ni mutu kakwísa kwena meni, amana kakondi menga tata wandi yi ngudi wandi yi mukhetu wandi yi bana bandi yi baphangi bandi —inga, ata luzingu lwandi meni— kafwaniku kukala mulonguki wama. a a v26 “Menga” mwamu disongidila nzonzidi ya Kiebeleyo yina yisongila kuzola koma-koma mu kufwanikisa. Yesu kahanaku muswa wa kimbeni kwena biwutu bya nzu, kaasi wubati longidila lungongu kwena yandi luna luhitini mambu moosu mahika. 27Wuna kakondi kunata kitakani kyandi amana kakondi kundanda meni, kafwaniku kukala mulonguki wama. 28Yuka ni mosi wa benu kazola kutunga kibaka, kweku kazakala theti amana katanga thalu, ndangu kamona ho kena yi bima bifwanini mu kulungisa kibaka? 29Mukuma, yuka ni kasya mipfundila amana kalembana kulungisa, boosu bana bamona bwabuna báyandika kumuseya, 30mu kuzimbula: “Mutu wuna wáyandika kutunga amana kalembana kulungisa.” 31Ho phi, yuka ni kyamvu mosi kazola kwenda mu mvita yi kyamvu wukwawu, kweku kazakala theti amana kabanza ho kena yi ngolu, ni batu mafunda kumi, mu kunwanisa wuna wisi kwisa mu kunwanina yandi ni batu mafunda makumodi? 32Amana yuka ni kalembana, kakátuma bathumwa buna wukwawu kena kyana meni, amana kalomba mambu ma ngemba. 33Mu phila yimosi, wosu wa benu wuna kakondi yambula byosu bina kena byawu, kafwaniku kukala mulonguki wama.
34Mungwa wenina kima kya bukheti; kaasi yuka ni munzenzu wandi wuhwini, yi biki bavútwalawa hika? 35Wafwaniku mu tsi, wafwaniku mu mvumvu phi; bakáwulosa ku nganda. Wuna wenina yi matu ma kuyuka, kayuka!»
