Vutukenu Ku Mbundu Ku Thwala Kuma Kuyila

Bwosu bámuzimbwala tsangu za kuhondwa kwa Philatu, Yesu wámenga lubanza ni bana báfwa bakála basumuki kuluta bakwawu, amana wuzimbudi: Luvutukenu ku mbundu. Miti wa fiki wukondi kubuta wátambula mvula yimosi hika. Wáhulula mukhetu wukondi telama bwambote mu kilumbu kya sabata amana yandi wákembisa Tata wetu, wákebisa ni mwelu wenina wakanga, amana wádila.

Kapitulu 13.

Muna tangwa dina kaka, batu bamosi bisa muzimbwala tsangu za bisi Ngadidi, bana Philatu kábundikisa menga ma bawu yi mikhayilu mya bawu.

Yesu wubavutwadini: «Lubanzi ni bisi Ngadidi bana bakála basumuki kuluta bisi Ngadidi boosu bakwawu, kikuma banyókuka mambu mana? Heku, yiluzimbwadi; kaasi yuka ni luvutukaku ku mbundu, benu boosu kalúfwa phila mosi. Holo bana kumi yi nana bana báfwa tangwa musyetebengi wa Silowe wubabwidila, lubanzi ni bakála basumuki kuluta batu boosu ba Yelusalemi? Heku, yiluzimbwadi; kaasi yuka ni luvutukaku ku mbundu, benu boosu kalúfwa phila mosi.»

Amana wáta kingana kyaki: «Yakala mosi wákala yi miti wa fiki wakuna muna kilanga kyandi kya vinu. Wakwísa mu kusanda bibundu muna thandu, kaasi kámonaku kima. Wuzimbudi kwena mutu wuna wisi hela kilanga: “Tala, mvula tatu yibati kwisa mu kusanda bibundu muna miti wawu wa fiki, kaasi yímonaku kima. Zenga wawu! Kikuma kya biki wayúmwasa mafu konda mfunu?” Kaasi yandi wávutula: “Pfumu, yambula wawu mvula yayi phi, tii yi kuna yisima zunga-zunga yi kutudila mvumvu. Amana yuka ni wabuta bibundu mu mvula yalanda, mboti; kaasi yuka ni wabutaku, buna wakwángawa.”»

Mukhetu Wukutuka mu Kilumbu kya Sabata

Muna kilumbu kya sabata, Yesu kákala longa muna nzu mosi ya kimvuka ya Bayuta. Muna tangwa dina, mukhetu mosi wuna kitembu kimosi kyámulebisa mu mvula kumi yi nana, kákala wázenzama, kálendaku vumbuka konda.

Bwosu Yesu kámumona, wámutamika amana wuzimbudi: «Mukhetu, ngeyi wukutuki mu disa dyaku.»

Wáthetika moku ha thandu yandi, amana mu mbala yimosi wávumbuka, wázitisa Tata wetu.

Kaasi pfumu wa nzu ya kimvuka, wuna kafwemiki kikuma Yesu wábuka mbefu muna kilumbu kya sabata, wuzimbudi kwena mulumba-lumba wa batu: «Bilumbu sambanu bya kusadila bisalu byenina. Bwisenu mu kubuka muna bilumbu meni, kaasi heku muna kilumbu kya sabata.»

Pfumu wámuvutula: «Benu bakavungalosi! Muna kilumbu kya sabata, kosu mutu wa benu kakutumunaku ngombi yandi holo ane yandi muna phaka, amana wunata yandi mu kunwa mamba? Mukhetu wawu, mwana wa Bulahami, wuna Satana kázitika mu mvula kumi yi nana, kafweti kutuka mu nkangu wawu muna kilumbu kya sabata?»

Bwosu kázonza mambu mana, batu boosu bana bakála mutendisa báfwa tsoni, amana mulumba-lumba wosu wa batu wásangwala kikuma kya mambu moosu ma lukumu mana kakála sala.

Kipfumu Kyisi Kola Bwosu Kheni

Buna Yesu wázimbula: «Yi biki kifwanani Kipfumu kya Tata wetu? Yi biki pfwani fwanikisakya? Kifwanani yi kheni ya tidi, yina mutu mosi kábonga ndangu kayikuna mu kilanga kyandi; buna yikodi yikituka miti, kwena banuni bya ku zilu bisi tungila mazamba mu mihandi myandi.»

Amana wázimbula hika: «Yi biki pfwani fwanikisa Kipfumu kya Tata wetu? Kifwanani yi muvimbu kabonga mukhetu mosi amana wásweka muna mindungu mitatu mya pfuba, tii yi kuna pfuba yosu yáthutumuka mu muvimbu.»

Kotilenu mu Mwelu Wafitakana

Yesu wakwénda, wáhyokila muna mabanza yi muna mahata, kakala longa amana kakála dyatila nzila kuna Yelusalemi. Mutu mosi wámuhyula: «Pfumu, bana bahuluka badi bakhunda?» Yesu wubazimbwadi:

«Syakenu ngolu mu kukota muna mwelu wafitakana. Mukuma yiluzimbwadi, balawu bazola kukota, kaasi bálendaku. Kunima dya mukwa nzu kutelama amana kazibika mwelu, benu lwatelama ku phenza, kalúkhokwatila mwelu, lwazimbula: “Pfumu, tuzibudila.” Kaasi yandi kavútula: “Yiluzayiku, kweti lutuki.” Buna benu lwayandika mu kuzimbula: “Betu twádya amana twánwa ha thwala yaku; ngeyi wálonga muna mabala-bala metu.” Kaasi yandi kavútula: “Yiluzimbwadi, yiluzayiku kweti lutuki. Katukenu kwena meni, benu boosu bisi sala mambu mambi!” Kwakála bidilu yi khwekisa za menu, tangwa lwamóna Bulahami yi Yizaki yi Yakobi yi bambikudi boosu muna Kipfumu kya Tata wetu, amana benu meni-meni balulosa ku phenza. Batu bakwísa ku tsosu yi ku ndamba, ku zulu yi ku banda, amana bakála tambula kizika mu kudya muna Kipfumu kya Tata wetu. Amana kyedika, bamosi bena ba nima bana bakála ba theti, amana bamosi bena ba theti bana bakála ba nima.»

Yesu Wudidila Yelusalemi

Muna tangwa dina kaka, Bafwadisi bamosi bisa kwena yandi, bámuzimbwala: «Katuka, wenda haha, kikuma Eloti kazola kukuhonda.»

Amana wubazimbwadi: «Alwenda, luzimbwala kwena nkewa yina: Tala, meni yibati kukula bitembu bya mbi amana yibati buka bambefu lelu yi mbazi, amana mu kilumbu kya tatu yimanisi kisalu kyama. Kaasi yifweti diata nzila lelu yi mbazi yi mu kilumbu kyalanda, mukuma ka mbikudi mosi ku kalenda fwila ku phenza ya Yelusalemi.

Yelusalemi, Yelusalemi! Ngeyi wisi honda bambikudi, amana wisi losa matadi kwena bana batumunu kwena ngeyi! Mbala za lawu yízola kukutikisa bana baku, bwosu khoku kisi kutikisa bana ba yandi ku tsi ya mahela mandi, kaasi lwázolaku! Tala, nzu yenu yisadusu kwena benu. Yiluzimbwadi: benu lwambónaku hika, tii kuna tangwa lwazimbula: “Kasakumuka wuna wisi kwisa mu khumbu ya Tata wetu!”»