Luka 19 FHB Father's Heart Bible™

19 ¹Yesu wákota mu Yediko, amana wakala sabuka muna yawu. ²Amana kwakuna kwákala mutu mosi, khumbu yandi Zakhayi; yandi kákala mbuta wa balaki ba phaku, amana kákala mvwama. ³Yandi kazodi kumona nani kena Yesu, kaasi kafwaniku kikuma kya kibuka kya batu—yandi kákala wa khufi. ⁴Buna wendi tswasu ku thwala amana wázanza ha nti mosi wa sikomole hanga kamumona, mukuma Yesu kazodi sabuka muna nzila yina.

⁵Muna tangwa Yesu kátula hana homa, wátala ku zilu, amana wumuzimbwadi: «Zakhayi, kulumuka tswatsu, mukuma lelu yifwana kuzinga kuna nzu yaku.»

⁶Buna wákulumuka tswatsu amana wámuyamba yi kyesi kyosu. ⁷Buna bámona mana, batu boosu báyandika mu kubokuta: «Wendi kuzinga kwena mutu wa masumu.»

⁸Zakhayi wátelama amana wuzimbudi kwena Pfumu: «Tala, Pfumu, yihana kyati kya bima byama kwena batsukami, amana yuka ni yakonguna mutu kima, yimuvutula mbala ziya ya lawu.»

⁹Yesu wumuzimbwadini: «Lelu luhulusu lwisa mu nzu yayi, mukuma yandi phi wenina mwana wa Bulahami. ¹⁰Mukuma Mwana wa mutu wísa mu kusanda yi mu kuhulula bana bátota.»

Basadi ba Bulemvu Bisi Hingila Kinga

¹¹Bwosu bakala hinikina, wábaheka kingana, mukuma kákala bela-bela yi Yelusalemi amana bábanza ni Kipfumu kya Tata wetu kakála monika muna mbala mosi.

¹²Buna wuzimbudi: «Mutu mosi wa kinzitusu wakwénda ku tsi ya thama hanga katambula kipfumu kyandi amana kavutuka. ¹³Wátela kumi ba basadi bandi, amana wáhana kwa kadika mosi mbongu ya ngonda zitatu, amana wuzimbudi: “Salenu kikhita ni yayi tee yikavutuka.” ¹⁴Batu ba tsi yandi bámumenga amana báthuma bathumwa ku manima mandi, bazimbudi: “Betu tuzodiku ni mutu yandi katuyadila.”

¹⁵«Kunima dya kutambula kipfumu, wávutuka, amana wátela basadi bandi bana káhana mbongu, hanga kazaya mana kadika mutu kádumba. ¹⁶Wuna wa theti wísa, wuzimbudi: “Pfumu, mbongu yaku yidumbudi kumi ya lawu.”»

¹⁷«Yandi wuzimbudi: “Bwa bukheti, musadi wa bukheti! Bwosu wúkala mulemvu mu dyambu dya khunda, yikúyadika ha thandu ya mbanza kumi.”»

¹⁸«Amana wuna wa bodi wísa, wuzimbudi: “Pfumu, mbongu yina wámpheka yidumbudi tanu ya lawu.”»

¹⁹«Amana wumuzimbwadini: “Amana ngeyi yikúyadika ha thandu ya mbanza tanu.”»

²⁰«Amana mukwawu wahika wísa, wuzimbudi: “Pfumu, tala mbongu yaku, yina yázinga muna lele; ²¹mukuma yákala yi bweya kwena ngeyi, mukuma ngeyi wenina mutu wa mathata: wisi bonga mana wakonda sya, amana wisi hela mana wakonda kuna.”

²²Yandi wuzimbudi: “Mu nwa waku meni-meni yikufundisa, musadi wa mbi! Wuzayi ni meni yenina mutu wa mathata, yisi bonga mana yakonda sya, amana yisi hela mana yakonda kuna? ²³Buna kikuma kya biki wakonda sya mbongu yama ku banki? Mu kuvutuka kwama, khadi tambula yawu yi muluta.” ²⁴Wuzimbudi kwena bana bákala batelama hana: “Bongenu mbongu kwena yandi amana luhana yawu kwena wuna wenina yi kumi ya lawu.”»

²⁵«Amana bámuzimbwala: “Pfumu, yandi wenina yi kumi ya lawu! ²⁶Yiluzimbwala ni: wosu wuna wenina yi kima, kahékalwa lawu; kaasi kwena wuna kakonda, ata kina kenina kyawu, kabótolwalwa. ²⁷Kaasi lunata bambeni bama baba bana bakonda zola ni yibayala, amana luzihonda ku thwala yama.”»

Mwana Wisi Kota ku Yelusalemi Hanga Kinga

²⁸Kunima dya kuzimbula mambu mana, wakwénda ku thwala, mu kuzanza ku Yelusalemi.

²⁹Bwosu kátula bela-bela yi Betifasi yi Betaniya, ku mongu wa Olive, wáthuma bodi ba balonguki, ³⁰wuzimbudi: «Ndenu ku hata dina dyenina ku thwala. Muna kukota kwenu, lwawána mwana wa ane wukutama kwakuna, wuna mutu kázakalaku ha thandu yandi. Lukutula yandi amana lunata yandi vava. ³¹Yuka ni mutu kaluhyula: “Kikuma kya biki lubati kukutula yandi?” luzimbwala: “Pfumu mupfunu kamuvwini.”»

³²Buna bana kátuma bákwenda amana bawani bwosu kábazimbwala. ³³Bwosu bakala kutula mwana wa ane, bapfumu bandi bábazimbwala: «Kikuma kya biki lubati kukutula mwana wa ane?» ³⁴Amana bawu bazimbudi: «Pfumu mupfunu kamuvwini.» ³⁵Bánata yandi kwena Yesu, amana bálosa miledi myawu ha thandu ya mwana wa ane, buna básya Yesu ha thandu yandi. ³⁶Amana bwosu kakala kwenda, batu báyala miledi myawu muna nzila. ³⁷Bwosu kátula bela-bela yi kukulumuka kwa mongu wa Olive, kibuka kyosu kya balonguki kyáyandika mu kusangwala, mu kuzatula Tata wetu mu ndinga ya ngolu kikuma kya bisalu byosu bya ngolu bina bámona, ³⁸wuzimbudi: «Lwasakumuka Kinga wuna wísa mu khumbu ya Tata wetu! Ngemba muna zilu yi khembu muna bisoka!»

³⁹Amana ndambu ya bafwadisi bana bákala mu kibuka bámuzimbwala: «Nlongi, songila balonguki baku.»

⁴⁰Yandi wuzimbudi: «Yiluzimbwala ni, yuka ni baba bamekaku, matadi meni-meni makáboka.»

⁴¹Amana buna kábwesuka yi mbanza amana wámona yawu, hanga wádila mu kikuma kya yawu,

⁴²yi kuzimbulaka: «Wadi ni ngeyi wázaya, lelu, mana makunatila ngemba! Kaasi buthwena mana maswekamu ku mesu maku. ⁴³Bilumbu bibati kwisa, mu bina bambeni baku bakatúnga luphangu mu kukuzyeta, bakakuzyeta amana bakakukanga ku ndambu zoosu, ⁴⁴amana bakakúkulumuna ngeyi yi bana baku mu kati dya bibaka byaku, bakasisaku ata tadi dimosi ha thandu ya dyakwawu, mukuma wukondi bakula tangwa dina wákwísilwa.» ^a a v44 “Tangwa dina wákwísilwa” disongidila tangwa dina Nzambi wakwísa ku Yelusalemi mu kimutu kya Yesu.

Yesu Wásemisa Nzu ya Tata wandi

⁴⁵Amana Yesu wákota kuna nzu ya Nzambi, amana wáyandika mu kukwasa bateki bana bákala kwakuna,

⁴⁶wubazimbwadini: «Masonuku mazimbudi: “Nzu yama yakála nzu ya lombilu”, kaasi benu lukitudi yawu saka dya bandwandwa.»

⁴⁷Kakala longa mu kosu kilumbu kuna nzu ya Nzambi. Muna tangwa dina, bambuta ba banganga Nzambi, balongi ba mitsiku yi bapfumu ba batu, bakala sanda nzila ya kumuhonda, ⁴⁸kaasi báwana kima ku kya kusala, mukuma batu boosu bakala hinikina ndinga zandi.