Bámuhyula Yesu mu Hamu Dyandi
Kilumbu kya mitambu mu nzu ya Nzambi. Bámuhyula mu hamu dya nati wisi hanga mambu mana, amana yandi wábavutula ni kyufu kina bawu bazimba kuvutula, hanga wázimbula kingana kya basadi bana bahonda mwana wa pfumu wa kilanga. Ni mbongu wáheka Khayisala kwandi yi Tata wetu kwandi, wázimbula phi kyufu kya mfutumuku, amana wákebisa kikuma kya balongi ba mitsiku.
Tata wetu kisi zonza mu mavese 42–43
20 1Kilumbu kimosi mu bilumbu bina, bwosu Yesu kakala longa batu kuna nzu ya Nzambi amana kakala samuna Nsamu wa Mboti, bambuta ba banganga Nzambi yi balongi ba mitsiku bisa kumosi yi bambuta, 2amana bámuhyula: «Tuzimbwala, mu hamu dya nati wisi hanga mambu mana, ho nati wuhani hamu dyadi kwena ngeyi.»
3Wubavutwadini: «Meni phi yilúhyula kyufu kimosi. Luzimbwaleti: 4Mbotika ya Yowani yátukila ku zilu, ho kwena batu?»
5Báyandika kudizonzila bawu yi bawu: «Yuka ni tuvutula: “Yátukila ku zilu”, kazímbula: “Buna kikuma kya biki lwakonda kumukwikila?” 6Kaasi yuka ni twazímbula: “Kwena batu”, batu boosu bakátuzuba matadi, mukuma bawu boosu bakwikidi ni Yowani wákala mbikudi.» 7Buna bavutudi ni kabázayaku kuna yátuka.
8Amana Yesu wubazimbwadini: «Meni phi, kayiluzimbwalaku keti mu hamu dya nati yisi hanga mambu mana.»
Tata Katuma Mwana Wandi wa Luzolu
9Yesu wuyandikini mu kubazonzila batu kingana kyaki: Mutu mosi wákuna kilanga kya vinu, wáluwisakya kwena basadi ba vinu, amana wénda mu kitambu bilumbu bya lawu. 10Muna tangwa dya mbongu, wáhitika musadi mosi kwena basadi ba vinu ndangu bamúbongila ndambu ya mbutu ya vinu. Kaasi bámubeta amana bámuvutula moku ma mphamba. 11Wátuma musadi wukwawu; bámubeta yandi phi, amana tsoni zámukwata, bámuvutula moku ma mphamba. 12Amana wátuma wa tatu, kaasi bámubeta yandi phi tii yi phuta, amana bálosa yandi ku nganda. 13Mukwa kilanga kya vinu wuzimbudi: «Biki yihánga? Kayithuma mwana wama wa luzolu; mbanzi bamúzitisa.»
14Kaasi bwosu bámumona, basadi bádizonzila bawu yi bawu: «Yandi kenina swana! Tumuhondenu, ndangu kuvwa kwasadila betu!» 15Bálosa yandi ku nganda ya kilanga kya vinu amana bámuhonda. Buna biki kahánga mukwa kilanga kya vinu kwena bawu?
16«Kakwísa, kabáhonda basadi bana, amana kahánakya kilanga kya vinu kwena bahika.» Bwosu báyuka mama, bazimbudi: «Byalendakanaku!»
17Wubatadi yi mesu mandi, amana wábahyula: «Buna biki disongidila mana básonika bwabu: “Tadi dina bálosa batungi dyákituka tadi dya sina dya mupfundila”?» a a v17 Mama matukidi mu Mukunga 118:22. 18«Mutu wosu wuna wabwa ha tadi dina katóluka bitini-bitini, amana ho dyabwíla ha mutu, kadímutusuna.»
Hana kwena Khayisala, Hana kwena Tata
19Balongi ba mitsiku yi bambuta ba banganga Nzambi bakala sanda phila ya kumukwatila muna tangwa medina, mukuma bábakula ni yandi kátila kingana kina kwena bawu. Kaasi báyuka bweya bwa batu. 20Bwosu bakala musimbulula yi tsikiningi, bátuma bambambala bana badikitudi ni benina batu ba masonga, ndangu bamukwata mu dyambu dyalubuka mu munwa wandi, hanga bamuheka ku luyalu yi ku hamu dya pfumu wa mbanza. 21Bámuhyula: «Mulongi, tuzayi ni ngeyi wisi zonza amana wisi longa mu masonga; kwisi tala zizi kya mutu ku, kaasi wisi longa nzila ya Nzambi mu kyedika. 22Bulombi kwena betu mu kufuta phaku kwena Khayisala, ho loni?»
23Kaasi bwosu kázaya bukamvi bwa bawu, wábazimbwala:
24«Tsongilenu fwalanga dimosi dya lufutu lwa kilumbu kimosi. Mbunzu yi bisona bina bya nati?» Bawu bazimbudi: «Bya Khayisala.»
25Wubazimbwadini: «Buna luheka kwena Khayisala bina bya Khayisala, amana kwena Tata wetu bina bya Tata wetu.»
26Kabálendaku kumukwata mu mambu mandi ku thwala ya batu, amana bwosu kitswi kibakwati mu mvutu yandi, báhwena talala.
Tata Wenina Nzambi wa Bamoyu
27Ndambu ya Basadise, bana bisi zimbula ni kweku lufutumuku lwa bafwa, bisa muhyula: 28«Mulongi, Moyize wátusonikina: yuka ni mutu mosi kafwa, kasisa mukhetu kaasi konda kubuta bana, myaki wandi kafweti kukwela mufwidi, ndangu kabutila bana kwena phangi wandi. b b v28 Mama matendudi mutsiku wa longu wuna básonika mu Dutelonome 25:5-6. 29Kinga, kwákala yi baphangi ba bayakala tsambwadi. Watheti wákwela, wáfwa konda kubuta mwana. 30Amana wa bodi wákwela yandi phi, 31amana wa tatu wámukwela, amana bwawu phi tsambwadi yawu yosu basisa konda bana amana bafwa. 32Ku tsuka, mukhetu yandi phi wáfwa. 33Buna ku lufutumuku, kakála mukhetu wa nati? Mukuma boosu tsambwadi bámukwela.»
34Amana Yesu wubazimbwadini: «Batu ba tsi yayi bisi kwelana yi kukwedisa,
35Kaasi bana bamonika ni bafwana mu kutula ku tsi yina yi ku lufutumuku lwa bafwa, kabakwelanaku keti kukwedisa. 36Mukuma kabalendaku hika kufwa, kikuma bafwanana yi banzyo amana benina bana ba Tata wetu, bana ba lufutumuku. 37Kaasi Moyize yandi phi wásonga ni bafwa bisi futumuka, ha kivunza kya mbawu, bwosu katela Tata wetu ni Nzambi wa Bulahami, wa Yizaki yi wa Yakobi. c c v37 Nsamu wa kivunza kya mbawu wisi lema wenina mu Ekisode 3:2-6. 38Yandi kasiku Nzambi wa bafwa, kaasi Nzambi wa bana benina moyu, mukuma kwena yandi boosu benina moyu.»
39Buna ndambu ya balongi ba mitsiku bavutudi: «Mulongi, ngeyi wázonza mboti.» 40Mukuma kabámekaku hika kumuhyula kima.
Kidisitu wenina Mwana wa nati?
41Kaasi wubazimbwadini: «Mu biki balenda zimbula ni Kidisitu kenina mwana wa Tavidi?
42Mukuma yandi meni Tavidi kabati zimbula muna mikunga: “Tata wetu wázimbula kwena Pfumu wama: «Sikuka ku kitata kyama, d d v42 Mambu mama mátuka muna Mukunga 110:1. 43tii yi kuna yikitula bambeni baku kidyatilu kya malu maku.»”
44Tavidi buna kabati mutela ni Pfumu, buna mu biki kalenda kadila mwana wandi?»
45Buna batu boosu bakala muhinikina, wázimbula kwena balonguki bandi:
46«Dikengenu yi balongi ba mitsiku, bana bazodi kukangala yi mvwela za kaleyi, bazodi mboti muna mazandu, bifulu bya theti muna nzu za kimvuka za Bayuta, yi bifulu bya lukumu mu mikinzi, 47bana bisi botula nzu za bafwidi, amana, mu kudimonikisa kwa bawu, basambaka malombilu ma kaleyi. Bawu bakátambula pfundusu yimbuta.»
