Twákala Hanga Batu Bana Balota Ndosi
Dikana dya kutombuka.
Bakangadi bana bavutuka bisi zimbula ni luvutukilu lwafwanana hanga ndosi amana lwabasikisa munwa myawu yi kiseyu — buna bisi lomba Tata wetu luvutukilu lwa lawu, hanga nzadi zina zivutuka mu Negevi. Zitsikina ya buthwena yenina ni bana bisi kuna mu matsanga bakavutuka ku nzu bananga mikuta mya bule.
126 1Muna tangwa Tata wetu wávutula mamboti ma Siyoni, twákala hanga batu bana balóta ndosi. 2Amana munwa myetu myabasa yi kiseyu, amana ndinga zetu zábasa yi miboku mya kyesi; buna bázimbula ha kati dya makanda: «Pfumu watsadidi mambu ma mbuta kikuma kya bawu.» 3Tata wetu watsadidi mambu ma mbuta kikuma kyetu; twábasa yi tsambu.
4Vutula mamboti metu, A Tata wetu, hanga nzadi zina mu Negevi. a a v4 Negevi yenina tsi ya yuma yi mphatu yina yenina ku sudi dya Kiseledi; mwena nzadi zikonda mamba zibati zala mamba muna mbala mosi kunima dya mvula kunoka — kyawu kidimbu kya buna mamboti mabati vutuka muna mbala mosi. 5Bana bisi kuna mu matsanga bahéla yi miboku mya kyesi. 6Wosu wuna wulubuki mu bidilu, wunata dikuta dya mbutu mu kuna, kavutuka phi ku nzu yandi yi miboku mya kyesi, wunata mikuta mya bule.
