Kimvwama kisiku lenda kusumba nzila ya kuvutuka ku nzu
Kwena mutwadisi wa mikunga. Mukunga wa bana ba Kola.
Kingana kina kisi yuvulwa kwena bamvwama yi batsukami phila mosi: ka mutu ku wulenda kulubula phangi wandi mu lufwa. Mutu wa ngangu yi zoba bisi sisila kimvwama kya bawu phila mosi. Kivuvu kya nyimbidi kyenina kuma kwahika — Tata wetu kambonga kwena yandi mveni.
49 1Yukenu mambu mama, benu boosu bikanda; simbidilenu, benu boosu luzingila mu tsi yayi, 2ata batu ba kiphutu, ata batu ba lukumu, bamvwama yi batsukami, phila mosi. 3Munwa wama wukazímbula nduka; medina ma mbundu yama makwisa yi ngangu. 4Yibálula kutu dyama kwena kingana; ni nsambi yizimbula diswekamu dyama. 5Kikuma kya biki yiyúka boma muna bilumbu bya mbi byakwísa, tangwa mbi ya bana babati zola ni yibwila yisi kunzyengila, 6bana bisi sya mbundu mu kimvwama kya bawu amana bisi ditsikisa mu bimvwama bya bawu bya lawu? 7Mu kyedika, ka mutu ku wulenda kulubula phangi wandi amana kafúta thuka kwena Tata wetu kikuma kya yandi, 8thuka ya luzingu yenina ya thalu ya lawu; kweku lufutu lufwani mu kosu tangwa, 9hanga kazínga mvula yi mvula amana kamónaku kalunga. 10Mukuma kisi mona ni ata badimuka bisi fwa; zoba yi wukondi ngangu phila mosi bisi zíluka amana bisi sisila kimvwama kya bawu kwena batu bahika. 11Mazyamu ma bawu menina nzu za bawu mvula yi mvula, bifulu bya bawu bya kuzingila muna makula moosu, mbatanana báhana khumbu za bawu meni mu tsi za bawu. 12Mutu, mbatanana lukumu lwandi, kananginaku; yandi wenina hanga bambisi bina bisi zíluka. 13Yayi nzila ya bana bena yi kikwamina kya buzoba, yi ya bana bisi kubalanda, bana bisi sikununa mambu ma bawu.
14Hanga mikoku, báyidikila mu kalunga, amana lufwa kakála kalema ka bawu. Batu ba masonga kayala ha thandu ya bawu muna suka; bodi bya bawu kabivunda mu kalunga, kyana yi nzu za bawu za lukumu. 15Kaasi Tata wetu kalubula luzingu lwama mu ngolu za kalunga; mu kyedika kabonga meni kwena yandi meni. a a v15 Mu kuswaswana yi bamvwama bana balendiku kusumba nzila ya kuvukuka mu lufwa, mukunzi wa mukunga wisi sya mbundu ni Tata wetu yandi-meni kamuhulusa mu kalunga amana kamunata ku thwala ya yandi-meni.
16Kuyukaku boma tangwa mutu kakituka mvwama, tangwa khembu ya nzu yandi yisi yikama, 17mukuma mu kufwa kwandi kabonga kima ku; khembu yandi yikunlandaku ku nsi. 18Mbatanana muna luzingu lwandi kisi dibanza ni wusakumunu, batu bisi kuzatula tangwa wisi dikitula mamboti, 19kakhundakana yi mbandu ya batata bandi, bana bámonaku diaka mutemu. 20Mutu, mbatanana lukumu lwandi, wukondi ngangu, wenina hanga bambisi bina bisi zíluka.
