Tata wetu kisi tanga lukwikilu hanga masonga
Pholu kisi meka mbanzulu yandi ha Bulahami, wuna wátangwa mutu wa masonga ku thwala kakota mukhanda yi ku thwala mitsiku myakala. Lukwikilu lwenina heku kisalu kisi bonga lufutu ku, kaasi lwenina kuditsikisa mwena Tata wetu, wuna wisi hana luzingu kwena bafwa—kyokyo kikuma biki bangulungu phi balenda kala bana bandi.
Tata wetu kisi zonza mu mavese 17–18
4 1Buna biki twafweti zimbula ni Bulahami, khaka wetu wa kimutu, wáwana? 2Mukuma yuka ni Bulahami wákituka mutu wa masonga mu mihangu, kenina yi kima kya kuditsikisa—kaasi heku ku mesu ma Tata wetu. 3Mukuma biki Masonuku masi zimbula? Bulahami kákwikila mwena Tata wetu, amana dyátangama kwena yandi hanga masonga. a a v3 «Dyátangama» dyenina ndinga ya kutanga mbongu, kaasi Tata wetu kasi mutu wa kutanga mbongu konda lungongu ku. Bulahami wákwikila kaka mwena yandi, amana Tata wetu watála moku mandi makonda kima amana wázimbula ni yandi mutu wa masonga. 4Kwena wuna wisi sala, lufutu lutangamaku hanga kabu, kaasi hanga pfuka yandi. 5Kaasi kwena wuna kasi salaku, kaasi wisi kwikila mwena yandi wuna wisi kitula mutu wa mbi mutu wa masonga, lukwikilu lwandi lutángama hanga masonga. 6Bwosu Tavidi phi kisi zonza kikuma kya lusakumunu lwa mutu wuna Tata wetu kisi tanga masonga kwena yandi, konda mihangu: 7«Benina ba kusakumuna bana mitsoki mya bawu milolukini, amana bana masumu ma bawu makusweka; 8ba kusakumuna wenina mutu wuna Tata wetu katángilaku hika disumu kwena yandi.»
9Buna lusakumunu lwalu lwenina kaka kikuma kya bana bákota mukhanda, ho kikuma kya bangulungu phi? Twazimbula ni Nzambi wátanga lukwikilu lwa Bulahami hanga masonga. 10Buna bwabu dyátangama? Muna kukota mukhanda kwandi, ho muna kingulungu kyandi? Heku muna kukota mukhanda, kaasi muna kingulungu. 11Wátambula kukota mukhanda hanga kidimbu, kinyeminu kya masonga mana kákala mawu mu lukwikilu buna kákala kedi ngulungu, ndangu kakala tata wa boosu bana bisi kwikila ata bena bangulungu, ndangu masonga mátangama kwena bawu phi, 12amana tata wa bana bákota mukhanda, bana bakondi kota mukhanda kaka, kaasi bisi dyata phi mu bitambi bya lukwikilu lwa tata wetu Bulahami luna kákala lwawu buna kákala kedi ngulungu.
13Mukuma kilangi kina básila kwena Bulahami yi butuka dyandi, ni kakála mutu wa kuvwa tsi, kyisiku kwisa mu nzila ya mitsiku, kaasi mu masonga ma lukwikilu. 14Mukuma yuka ni bana bisi zinga mu mitsiku benina baswana, buna lukwikilu lwenina lwa phamba, amana kilangi kituka kya phamba. 15Mitsiku myisi natisa khabu; kaasi kuna kukondi mitsiku, kweku phi kulula kwa mitsiku.
16Yihana kyisa mu lukwikilu, ndangu kyakala mu khenda, ndangu kilangi kyakala syama kwena butuka dyosu—heku kwena bana ba mitsiku kaka, kaasi kwena bana phi bena yi lukwikilu lwa Bulahami, tata wetu betu boosu,
17bwosu básonika: «Yákukitula tata wa nati za lawu»—ku mesu ma Tata wetu, wuna kákwikila mwena yandi, wuna wisi futumuna bafwa amana wisi tela thinu bina bikondi kala ndangu byakala. 18Ata muna kukonda kivuvu, kákwikila mu kivuvu, wákituka tata wa nati za lawu, bwosu bámuzimbwala: «Phila yayina bwakala butuka dyaku.»
19Kákalaku mbefu mu lukwikilu, kámona lutu lwandi-meni hanga lufwa—mukuma kákala kitesu kya mvula khama—amana vumu kya Sala kyákala konda moya. 20Kakálaku yi phaka mu kilangi kya Tata wetu mu kukonda kwa lukwikilu, kaasi wákala syama mu lukwikilu, wáhana khembu kwena Tata wetu, 21mukuma wátambwasa mu mbundu yandi yosu ni mana Tata wetu kásila, kakála phi yi ngolu mu kuhanga mawu. 22Kikuma kya bwabuna, «dyátangama kwena yandi hanga masonga.» 23Kaasi básonika ndinga zazi, «dyátangama kwena yandi», heku kikuma kya yandi lwesi, 24kaasi kikuma kya betu phi, bana masonga makwisa tangama kwena betu—betu bana bisi kwikila mwena yandi wuna wáfutumuna Pfumu wetu Yesu mu bafwa, 25wuna bámulambula kikuma kya masumu metu amana wáfutumuka ndangu katukitula batu ba masonga ku mesu ma Tata wetu.
