ዐለቴ ሆይ፣ ዝም አትበል
የዳዊት መዝሙር።
የዳዊት ፍርሃት ዝምታ ነው፤ አብ፣ ዓለቱ፣ ባይመልስለት አስቀድሞ ከሙታን ጋር ነው። ወዳጅነትን እየተናገሩ ክፋትን ከሚደብቁ ሰዎች ጋር እንዳይጎተት ይለምናል። በመካከል ይሰማል፤ ጸሎቱም ምስጋና ይሆናል።
28 1አባቴ ሆይ፣ ወደ አንተ እጠራለሁ፤ ዐለቴ ሆይ፣ ጆሮ ዳባ አትበለኝ፤ ዝም ብትለኝ፣ ወደ ጕድጓድ እንደሚወርዱ እሆናለሁና።
2ለእርዳታ ወደ አንተ በጮኽሁ ጊዜ፣ እጆቼን ወደ ቅዱስ መቅደስህ ባነሣሁ ጊዜ፣ የምሕረት ልመናዬን ስማ።
3ከክፉዎች ጋራ፣ ክፉ ከሚያደርጉ ጋራ አትጐትተኝ፤ እነርሱ በልባቸው ክፋት ሳለ ለባልንጀሮቻቸው የሰላም ቃል ይናገራሉ። 4እንደ ሥራቸው መጠን፣ እንደ ክፉ ድርጊታቸውም ብድራታቸውን ክፈላቸው፤ እንደ እጆቻቸው ሥራ ብድራታቸውን ክፈል፤ የሚገባቸውንም መልስባቸው። 5የአባቴን ሥራ ወይም የእጆቹን ሥራ ግድ ስለሌላቸው፣ ያፈርሳቸዋል እንጂ ዳግመኛ አይገነባቸውም።
6አባታችን ይባረክ፤ የምሕረት ልመናዬን ሰምቶአልና። 7አባቴ ኀይሌና ጋሻዬ ነው፤ ልቤ በእርሱ ይታመናል፣ እረዳለሁም፤ ልቤ በደስታ ይዘላል፣ በዝማሬዬም አመሰግነዋለሁ።
8አባቴ የሕዝቡ ኀይል ነው፤ ለተቀባውም የማዳን አምባ ነው። 9ሕዝብህን አድን፣ ርስትህንም ባርክ፤ እረኛቸው ሁን፣ ለዘላለምም ተሸክማቸው።
