Abiyam a Ne Koma mu Apaapae wɔ Yuda

Abiyam yɛ n'agya bɔne no bi, nanso Yerusalem gyina Dawid nti. Asa hwehwɛ yɛn Agya koma, hyew ne nanabaa Asera ohoni no, nanso ɔde asɔredan dwetɛ tɔ Aram mmoa. Wɔ Israel, Baasa kum Nadab na ɔpopa Yeroboam abusua nyinaa.

Ti 15.

Ɔhene Yeroboam, Nebat ba, ahenni afe a ɛtɔ so dunwɔtwe mu no, Abiyam fii ase dii Yuda so hene. Odii hene wɔ Yerusalem mfe abiɛsa. Ne na din de Maaka, Abisalom babea. Ɔyɛɛ bɔne a nʼagya yɛe ansa na ɔbaa no nyinaa bio; ne koma antena yɛn Agya so koraa, sɛnea ne nana Dawid koma tenaa so no. Nanso Dawid nti, yɛn Agya maa no kanea wɔ Yerusalem; ɔmaa ne ba sɔre dii nʼade, na ɔmaa Yerusalem gyinaa pintinn. Dawid yɛɛ nea ɛteɛ wɔ yɛn Agya ani so, na wamman amfi biribiara a ɔhyɛɛ no no ho da, ne nkwa nna nyinaa, gye Uria Hetini asɛm no nko ara. Ɔko kɔɔ so wɔ Rehoboam ne Yeroboam ntam wɔn nkwa nna nyinaa. Abiyam nnwuma a aka, nea ɔyɛe nyinaa, wɔankyerɛw wɔ Yuda ahene abakɔsɛm nhoma mu anaa? Ɔko kɔɔ so wɔ Abiyam ne Yeroboam ntam. Abiyam ne nʼagyanom kɔdaa, na wosiee no wɔ Dawid kurow mu. Ne ba Asa na odii nʼade sɛ ɔhene.

Asa Hwehwɛ Agya no Koma

Israel hene Yeroboam ahenni afe a ɛtɔ so aduonu mu no, Asa fii ase dii Yuda so hene. Odii hene wɔ Yerusalem mfe aduanan baako. Ne nanabea din de Maaka, Abisalom babea. Asa yɛɛ nea ɛteɛ wɔ yɛn Agya ani so, sɛ ne nana Dawid. Ɔpam mmarima a wɔyɛ abosonnan mu aguamammɔfo no fii asase no so, na oyii ahoni a ne nananom yɛe no nyinaa. Oyii ne nanabea Maaka fii ɔhemmaa dibea so, efisɛ ɔyɛɛ ohoni a ɛyɛ akyiwade maa Asera; Asa twaa ne ohoni no guu fam, na ɔhyew no wɔ Kidron Bon mu. Nkoko so abosonnan no de, ɛkɔɔ so tenaa hɔ, nanso Asa koma tenaa yɛn Agya so koraa ne nna nyinaa. Ɔde nneɛma kronkron a nʼagya ahyira so no ne ne ankasa akyɛde kronkron, dwetɛ, sika kɔkɔɔ ne nkuku kronkron, baa yɛn Agya fi.

Ɔko kɔɔ so wɔ Asa ne Israel hene Baasa ntam wɔn nna nyinaa. Israel hene Baasa tuu sa kɔɔ Yuda so, na ɔbɔɔ Rama ho ban, na wamma obiara amfi Yuda hene Asa ahemman mu, na wamma obiara ankɔ mu nso. Afei Asa faa dwetɛ ne sika kɔkɔɔ a aka wɔ yɛn Agya fi ademude dan mu ne ahemfi ademude dan mu no nyinaa de maa ne nkoa. Ɔhene Asa somaa wɔn kɔɔ Aram hene Ben-Hadad, Tabrimon ba, Hesion nena, a odi hene wɔ Damasko no nkyɛn, na ɔde asɛm yi kɔe se: “Ma apam mmɛda me ne wo ntam, sɛnea na ɛda mʼagya ne wʼagya ntam no. Mede dwetɛ ne sika kɔkɔɔ resoma wo sɛ akyɛde. Kɔ na kɔsɛe apam a wo ne Israel hene Baasa ayɛ no, na wafi me so akɔ.”

Ben-Hadad tiee Ɔhene Asa, na ɔsomaa nʼakofo asahene ma wɔkɔtoaa Israel nkurow. Ɔdii Iyon, Dan, Abel-Bet-Maaka, Kinneret nyinaa ne Naftali asase nyinaa so. Bere a Baasa tee eyi no, ogyaee Rama ho ban a ɔrebɔ no, na ɔtenaa Tirsa. Ɔhene Asa bɔɔ dawuru kyerɛɛ Yuda nyinaa, na wanyi obiara ankyɛn; na wɔfaa abo ne nnua a Baasa de rekyekye Rama no kɔe. Asa de kyekyee Geba a ɛwɔ Benyamin ne Mispa. Asa nnwuma a aka, nʼahoɔden nyinaa, nea ɔyɛe nyinaa ne nkurow a ɔkyekyee no, wɔankyerɛw wɔ Yuda ahene abakɔsɛm nhoma mu anaa? Nanso ne nkwakoraa mu no, yare bi kaa ne nan. Asa ne nʼagyanom kɔdaa, na wosiee no wɔ wɔn nkyɛn wɔ ne nana Dawid kurow mu. Ne ba Yehosafat na odii nʼade sɛ ɔhene.

Nadab Ahenni Bɔne wɔ Israel

Yeroboam ba Nadab fii ase dii Israel so hene wɔ Yuda hene Asa ahenni afe a ɛtɔ so abien mu, na odii Israel so hene mfe abien. Ɔyɛɛ bɔne wɔ yɛn Agya ani so, na ɔnantew nʼagya kwan so ne bɔne a ɔmaa Israel yɛe no mu. Isakarni Baasa, Ahiya ba, bɔɔ ne so pɔw, na Baasa kum no wɔ Gibeton, Filistifo kurow bi, bere a Nadab ne Israel nyinaa twa Gibeton ho ahyia no. Baasa kum no wɔ Yuda hene Asa ahenni afe a ɛtɔ so abiɛsa mu, na odii nʼade sɛ ɔhene. Bere a ɔbɛyɛɛ ɔhene pɛ no, okunkum Yeroboam fi nyinaa, na wannyaw obiara a ɔhome ma no, kosii sɛ ɔsɛee wɔn nyinaa, sɛnea yɛn Agya nam ne somfo Ahiya Silonini so kae no, esiane bɔne a Yeroboam yɛe na ɔmaa Israel nso yɛe no nti, na ɛhyɛɛ yɛn Agya, Israel Nyankopɔn, abufuw.

Nadab nnwuma a aka, nea ɔyɛe nyinaa, wɔankyerɛw wɔ Israel ahene abakɔsɛm nhoma mu anaa? Ɔko kɔɔ so wɔ Asa ne Israel hene Baasa ntam wɔn nna nyinaa.

Baasa Di Hene wɔ Israel

Yuda hene Asa ahenni afe a ɛtɔ so abiɛsa mu no, Ahiya ba Baasa bɛyɛɛ Israel nyinaa so hene wɔ Tirsa, na odii hene mfe aduonu anan. Ɔyɛɛ bɔne wɔ yɛn Agya ani so, na ɔnantew Yeroboam kwan so ne bɔne a ɔmaa Israel yɛe no mu.