Hiob Nnamfo Yɛ Komm
Nnamfo baasa no gyae, na aberanteɛ bi a ne din de Elihu a na ɔretie firi mfitiaseɛ no bo fuw kɛse: ne bo fuw Hiob sɛ ɔbu ne ho bem, ne bo fuw nnamfo no sɛ wobuu no fɔ a wonni mmuaeɛ. Ɔka sɛ nyansa fi Otumfoɔ home mu, ɛmfiri dwen mu.
32 1Enti saa mmarima baasa yi gyaee Hiob ano yi, efisɛ na ɔyɛ ɔtreneeni wɔ nʼankasa ani so. 2Afei Barakel a ofi Bus no ba Elihu a ɔwɔ Ram abusua mu no bo fuw denneennen. Ne bo fuw Hiob, efisɛ ɔbuu nʼankasa bem sen Onyankopɔn. 3Ne bo fuw Hiob nnamfo baasa no nso, efisɛ wɔannya mmuae biara, nanso wɔbuu Hiob fɔ. 4Elihu twɛn ansa na ɔrekasa akyerɛ Hiob, efisɛ na afoforo no yɛ mpanyin sen no. 5Nanso bere a Elihu hui sɛ saa mmarima baasa yi nni hwee ka no, ne bo fuwii. 6Enti Barakel a ofi Bus no ba Elihu kasae se, “Meyɛ abofra wɔ mfe mu, na mo de, moyɛ mpanyin; ɛno nti na mekaa me ho so, na misuroo sɛ mɛka nea minim akyerɛ mo. 7Misusuwii se, ‘Ma mfe nkasa, na ma mfe pii nkyerɛ nyansa.’ 8Nanso honhom a ɛwɔ onipa mu, Ade Nyinaa so Tumfo no home no, na ɛma ntease. 9Ɛnyɛ nkwakoraa na wɔyɛ anyansafo, ɛnyɛ mpanyin nso na wɔte nea ɛteɛ ase. 10Enti mise, muntie me; me nso mɛka nea minim. 11Hwɛ, metwɛn mo nsɛm; mitiee mo nsusuwii bere a morehwehwɛ nea mobɛka no. 12Mede mʼadwene nyinaa too mo so; nanso mo mu baako mpo ankyerɛ sɛ Hiob adi mfomso, anaa wammua nʼakyinnyegye. 13Enti monnka se, ‘Yɛanya nyansa; ma Onyankopɔn nkyerɛ ne mfomso, na ɛnyɛ onipa.’ 14Hiob nhyehyɛɛ ne nsɛm ntiaa me, na merenfa mo akyinnyegye mmua no. 15Wɔn ho adwiriw wɔn, na wonni biribi bio a wɔbɛka; nsɛm asa wɔn ano. 16Ɛsɛ sɛ metwɛn, afei a wɔayɛ komm, afei a wogyina hɔ a wonni mmuae biara? 17Me nso mɛka me de; me nso mɛka nea minim. 18Efisɛ nsɛm ahyɛ me ma; honhom a ɛwɔ me mu no hyɛ me. 19Me mu no, mete sɛ nsã a enni baabi a ɛbɛfa apue, te sɛ nsã nkotoku foforo a ɛrebɛpae. 20Ɛsɛ sɛ mekasa na menya ahotɔ; ɛsɛ sɛ mebue mʼano na mebua. 21Merenhwɛ obiara anim, na merenka obiara ho nsɛm dɛdɛ nnaadaa no; 22efisɛ minnim sɛnea wɔka nsɛm dɛdɛ nnaadaa— sɛ meyɛ saa a, anka me Yɛfo de me bɛkɔ ntɛm.”
