Yobi Wuvutudi
Yobi wisi seva lusadisu luna bámuheka, buna wisi luta nkundi wandi mu kuyimbila ngolu za Tata wetu: tsi yina kahanga hana khatu, mamba mana makangwa muna matuti, yanga dina dyatalala, Lahabi wuna wátoluka. Amana mamana moosu, wisi zimbula, menina kaka mbela ya ndinga yafyoti ya yandi.
26 1Amana Yobi wávutula: 2«Bwena buna wáyakidila mutu wakonda ngolu! Bwena buna wáhulula koku dyakonda ngolu! 3Bwena buna wálonga mutu wakonda mudimu, amana wáfwebwalaza ngangu zalungila! 4Nati wákusadisa mu kuzonza ndinga zazi? Amana mwela wa nati wátuka mwena ngeyi? 5Bitembu bya bafwa bisi nikana—bana benina ku tsi ya mamba yi boosu bana bisi zingila mu kati dyawu. 6Kalunga kenina khonga ku mesu ma Tata wetu, amana Kuzangana konda mvwela. 7Wisi yalumuna zilu dya ku nodi hana thandu ya phamba; wisi hanga tsi hana thandu ya khatu. 8Wisi kanga mamba muna matuti mandi ma nene, kaasi matuti mabúdikaku ku tsi ya kizitu kya mamba. 9Wisi fidinga mbunzu ya ngondi yazala, mu kuyadingisa matuti mandi hana thandu yandi. 10Wásona kinzunga hana thandu ya mamba, kuna tsuka yina yenina hana kati dya mwini yi phipha. 11Makunzi ma mazilu masi nikana, masi yituka mu kukaya kwandi. 12Mu ngolu zandi wátalalisa yanga dya mbuta; mu ngangu zandi wátolula Lahabi, bulu kya yanga. 13Mu mwela wandi mazilu mákituka ma kasemi; koku dyandi dyátubula nyoka wuna wisi tina. 14Amana mamana menina kaka mbela ya nzila zandi— bwena buna ndinga yafyoti yina tuyuka mwena yandi! Kaasi thungidi za ngolu zandi, nati wufwani kubakula?»
