Tata Wáhitika Mwana Wandi

Wabutuka muna tangwa dya pfundusu ya tsi yosu, mu mbanza yina yakala konda kya bawu, amana bamuleka muna kidilu kya bibulu, buna bahungudi bayuka dyawu theti. Kunima, Simeyoni wamusimba amana walongula Madiya ni ngumba yikutubula mbundu yandi phi, amana muna mimvu kumi yi mibodi wasala kunima, mu kutela nzu ya Nzambi nzu ya Tata wandi.

Tata wetu kisi zonza mu mavese 23–24

Kapitulu 2.

Muna bilumbu meni bina, Kayisa Ogusitu wáhana pfundusu ndangu básonika batu boosu ba tsi yosu. ^a Kusonika kwakwa kwákala kwatheti, muna tangwa dina Kidiniyusi kákala pfumu wa mbanza wa Sidiya. Batu boosu bénda ndangu básonika, kosu mutu ku hata dyandi. Yozefu phi wátombuka, tuka ku Ngadidi, tuka ku hata dya Nazaleti, kwenda ku Yuteya, ku mbanza ya Tavidi yina bisi tela Betelemi, mukuma kákala wa nzu yi butuka dya Tavidi, ndangu kasonika hakimosi yi Madiya, mbayi wandi, wuna wayímita.

Buna bakála kwakuna, tangwa dyandi dya kubuta dilungila. Wábuta mwana wandi wa yakala wutheti, wámuvungaya ha miledi, amana wámuleka muna kidilu kya bibulu, mukuma kifulu kyákala konda kikuma kya bawu muna nzu ya banzenza.

Bahungudi bákala muna tsi meni dina, bánanga ku bilanga, bátsinza kibuka kya mikoku kya bawu mu phipha. Wanzyo wa Tata wetu wátelama ku thwala ya bawu; khembu ya Tata wetu yákedyama nzyengila bawu, amana wóma wa lawu wábabwila. Wanzyo wubazimbwadini: «Lubangaku wóma, mukuma yisi lunatina nsangu zambote za kyesi kya lawu kikuma kya batu boosu: Lelu, mu mbanza ya Tavidi, Muhuludi wábutukila benu, yandi Kidisitu, Pfumu. Kyaki kidimbu kyenu: lwawána mwana wakhunda wuna bávungaya ha miledi, waleka muna kidilu kya bibulu.» Muna mbala mosi, hakimosi yi wanzyo, hákala mulumba-lumba wa makesa ma ku zilu, bakala kumisa Tata wetu amana bakala zimbula:

«Khembu kwena Tata wetu muna bisoka, amana hana tsi ngemba kwena batu bana kasephidisa!» ^b

Kunima dya banzyo kusisa bahungudi mu kwenda ku zilu, bahungudi bazimbwala bawu yi bawu: «Tukwendeni tswasu ku Betelemi amana tumona dyambu dyadi dina dibwa, dina Tata wetu kátuzayisa.» Bénda tswasu amana báwana Madiya yi Yozefu, yi mwana wakhunda waleka muna kidilu kya bibulu. Buna bámumona, bázayisa mana bázimbwala kwena bawu matadidini mwana meni. Boosu bana báyuka bayituki lawu mu mana bahungudi bázimbwala kwena bawu. Kaasi Madiya wálunda mambu moosu mama, wabánza mawu muna mbundu yandi. Bahungudi bávutuka, bakala zatula yi kumisa Tata wetu kikuma kya mamoosu mana báyuka yi mana bámona, bwosu bázimbwala kwena bawu.

Bámusongila Kwena Tata

Buna bilumbu nana bya kukota mukhanda byalúngila, bámutela Yesu, khumbu yina wanzyo káhana ku thwala kayímitama muna vumu.

Buna bilumbu bya kudisemisa kwa bawu, bwosu mitsiku mya Moyize mizonzini, byamánisa, bámunata ku Yelusalemi ndangu bamusongila kwena Tata wetu,

(bwosu básonika muna mitsiku mya Tata wetu: «Kosu mwana wa yakala wutheti kakála watoma kwena Tata wetu»), amana ndangu batambika kimenga, bwosu mitsiku mya Tata wetu misi zonza: tuyembi tuyodi holo bana babodi ba bibata.

Ku Yelusalemi kwákala mutu mosi, khumbu yandi Simeyoni, mutu wa masonga yi wa luzitu lwa Nzambi, wakala hingila lubombu lwa Kiseledi, amana Kitembu Kyatoma kyákala hana yandi. Kitembu Kyatoma kyámumonisa ni kafwaku ku thwala kamona Kidisitu wa Tata wetu. Mu lusendu lwa Kitembu, wákota kuna nzu ya Nzambi. Buna bambuta bánata mwana Yesu ndangu bamusadila mana mitsiku misi lomba, Simeyoni wámuzangula muna moku mandi amana wásakumuna Tata wetu, mu kuzimbula: «A Tata, Pfumu, buthwena wisi yambula musadi waku kakwenda mu ngemba, bwosu ndinga yaku. Mukuma mesu mama mámona luhulusu lwaku, luna wuyídika ku mesu ma makanda moosu: mwinda wa kusongila Baphani, amana khembu kwena batu baku ba Kiseledi.»

Tata wandi yi ngudi wandi bayituki lawu mu mana bázimbwala matadidini yandi. Amana Simeyoni wábasakumuna amana wázimbula kwena Madiya, ngudi wandi: «Mwana meni wábikama kikuma kya lubwa yi lutelama lwa batu balawu muna Kiseledi, amana kakala kidimbu kina batu bakála tendana, amana mbedi yatoba moya waku ngeyi-meni phi — hanga mabanza ma mu mbundu za batu balawu mamonika.»

Kwákala phi mbikudi wa mukhetu, khumbu yandi Ana, mwana wa Fanweli, wa kanda dya Aseli. Yandi wakala kinunu kya lawu, wázinga yi bakala dyandi mvula tsambwadi tuka kukwela kwandi, amana wákituka mufwidi, mvula zandi makumi nana yi ya. Konda katuka mu nzu ya Nzambi, wakala sadila Nzambi mu kukanga nzala yi mu kulombila, phipha yi mwini. Mu kwisa muna tangwa meni dina, wátonda Tata wetu amana wázonza matadidini mwana meni kwena boosu bana bakala hingila lukudulu lwa Yelusalemi.

Kunima dya kumanisa mamoosu mana mitsiku mya Tata wetu misi lomba, bávutuka ku Ngadidi, ku hata dya bawu dya Nazaleti. Mwana wákola, wákituka ngolu, wabasa yi diela, amana khenda ya Tata wetu yákala hana yandi.

Mwana Yesu mu nzu ya Tata wandi

Amana bambuta bandi bakala kwenda ku Yelusalemi kosu mvula mu nkinzi wa Phasika. Muna tangwa kakala yi mvula kumi yi zodi, bátombuka bwosu kikalulu kya nkinzi. Kunima dya kumanisa bilumbu bya nkinzi, amana bavutuka ku nzu, mwana Yesu wásala ku Yelusalemi, kaasi bambuta bandi bázayaku. Bwosu bakala banza ni kenina mu kibuka, bénda kitambu kya kilumbu kimosi, amana báyandika kumusanda hana kati dya biwutu yi bana bámuzaya. Kaasi buna bámumonaku, bávutuka ku Yelusalemi mu kumusanda. Kunima dya bilumbu bitatu, bámumona kuna nzu ya Nzambi, wavwanda hana kati dya balongi, yi kubayuka amana kubahyula. Boosu bana bámuyuka, báyituka kikuma kya mazaya mandi yi mavutulu mandi. Buna bambuta bandi bámumona, báyituka. Ngudi wandi wuzimbudi: «Mwana, kikuma kya biki watusadila bwabu? Tala, tata waku yi meni, tukala yi phasi mu kukusanda.»

Yandi wubazimbudi: «Kikuma kya biki lwakala kunsanda? Lwázayaku ni ni mbati kala mu nzu ya Tata wama?» ^c

Kaasi bábakisaku ndinga yina kábazimbwala. Amana wákulumuka yi bawu, amana wátula ku Nazaleti, wakala walemvuka kwena bawu. Ngudi wandi wásimbidila mambu moosu mama ku mbundu yandi. Yesu walutuka mu ndwenga yi mu mutela, yi mu khenda kwena Tata wetu yi kwena batu.